ظروف الليالي تصنع من الرجال رجال

ظروف الليالي تصنع من الرجال رجال
                                      وتضعف ضعيف العزم لا مرّته مرّه

تراها سوات الصنفره والقسا لاطال

                                   يبين لك المقدام واللي على الجرّه

ويظِهرلك الرجلي ويظِهر لك الخيّال
                                ويظهِر لك الحلوه ويظهِر لك المرّه

ويظِهر رجالٍ كان ماهم بـ لك فالبال
                                       ويصغِر رجالٍ فيهم الناس مغترّه

وتظهِر صديق الصدق والصاحب الدجال
                                   وتظهِر صديقٍ ليت خيره كفا شرّه

وتدري بمعنى كلمةٍ ان للحمول جمال
                                          وتدري بمعنى مايساوي ربع ذرّه

فلا كل من هو طب سوق الفخر يكتال
                            ولامن دخل في المعركه يقدر الكرّه

وانا واثق ان مافيه عقده بلا حلّال
                                        ولافيه وجهٍ لاهب القيظ ما  مرّه

ولافيه في الدنيا على الحال يبقى حال
                                  يدور الفلك وتجيك الايام مفترّه

فلا تضعف اليا  جتك  بعض السنين هزال
                            وجيبك على مافي كنين الحشا   زرّه

تجمّل بصمتك والبس الصبر لبس عقال
                                    وتمطر سماك وتصبح الروح مسترّه

يجيك المدد من خالقك دافقٍ همّال
                               وتلقى  صحاري وقتك الجرد مخضرّه