كروش فرس عبيد الرشيد / أبيات

احبتي هذه قصيدة للامير عبيد العلي الرشيد في فرسه المشهورة كروش .
وفي هذه القصيدة يرفض عبيد طلبا من والي مصر عباس باشا الذي سمع عن

فرس عبيد كروش الكثير وارسل وفدا يطلبها منه،ويرفض عبيد طلبه في هذه القصيدة:

يابيه انا لكروش ماعطي ولا ابيع ***** قبلك طلبها فيصل وابن هادي(1)

يابيه لو كثرّت بالقول ما أطيع ***** ياحيف تبغاني اسلم جوادي!

يابيه مايرهم على مثلها البيع ***** ولايجي مثله بقودة مهادي(2)

ما جمّع اصله بالقراطيس تجميع ***** اصله يعرفونه جميع البوادي

باغٍ الا من لقّموها المصاريع ***** وصاح الصياح وثار عج الطرادي

انهج عليها وتعدي بالتراثيع *****مثل الفحل لاصار وقت الهدادي

وأصلها لعيون بيض مفاريع ***** فوق الحنايا والسبايا غوادي

هذاك بيعه والصبايا مفاريع ***** بين القنا ومخفّرات الهنادي

هذاك بيعه كان ماتفهم البيع ***** لامنهن جلبن بسوق المزادي

يابيه انا ماسمع جوابك ولا أطيع ***** هرجه بمقلة ناظري والفوادي

ياسابقي مانرخصه بالمطاميع ***** حتم ولو قيل ارفعوا بالجوادي(3)

ابغي لاثار الدخن بالزعازيع ***** وحطوا على عجلاتهنّ العدادي

بيومٍ يشيّب من وحاه المراضيع ***** حدّين وحاديهن من الخوف غادي

انطح ورا ربعي وجيه المداريع ***** واقضي عليها دينهم والعيادي

وأنشد عن افعاله بعاد المفازيع ***** هو هرجنا ذا كذب ولا وكادي

من لابةٍ بالحرب ماهم مطاويع ***** ولا تحسّب بالمداس العوادي

حلفت مايطري علينا بها البيع ***** للحشر مايفخت سواده سوادي(4)

مادام راسي للرياح الذعاذيع ***** بالعون طالبها من الناس غادي

وديارنا حامينها بالمرابيع ***** واضدادنا عنها تجي بالحيادي

الاّ ان بغاه الليث حنا مخاضيع ***** لامره وهو فوقه كما البدر بادي(5)

هذاك انا وحذاي لامره مطاويع ***** فرز الوغى صياد من لايصادي

حرٍ يفدّع بابرق الريش تفديع ***** ولا يفرس الا من كبار الثنادي

طير السعد يفرح قلوب المراضيع ***** تشتاق له معها وهو بالمهادي

يدرا وترجى من وراه المنافيع ***** الليث يرجى للعطايا الزيادي

أودع مصاعيب القبايل مراجيع ***** والخيل جاته من عمانٍ تقادي

وصلّوا عدد ماحيش مال وما بيع ***** على نبيّ للورا خير هادي