١٠ اساطير سقطت عند أقدام كورونا .

الدكتور مجدي يعقوب جراح القلب الكبير يكتب فيقول:

١-سقطت اسطورة الفلوس قدام الفيروس .. 

اكتشفنا انها
عاجزة أمامه و هو متناهي في الصغر .. 

و الفلوس ما بقتش بتعمل السعادة و الحماية ، 

و تساوي الغني و الفقير ، 

و تبخرت نصف ثروات العالم في شهور بحثا عن علاج أو حماية..

٢-سقطت اسطورة الاغنياء و العظماء .. 

كله تساوي ، 

ما بقاش فيه VIP ، 

و لا سعادتك أو جنابك أو فخامتك.. 

كله بقي من غير حماية و لا جاه أو سلطة أو عزوة ..

٣-سقطت اسطورة 

"انا مهم" .. 

اهميتك راحت، 

و تحكمك و سلطانك ما بقي لوش اي داعي .. 

و بقيت قاعد في البيت مستخبي ورا ماسك و جوانتي ،

 و ما بقاش حد بيدور لا عليك و لا علي الحبتين بتوعك من مظهرية و أهمية فارغة ..

٤-سقطت اسطورة الملكية .. 

ما بقاش فيه معني للي عندك و انت عارف ان اللي عندك لا بقي نافعك و لا ساترك..

٥-سقطت اسطورة العمر.. 

بقي الموت اللي ما كنش علي بالنا ، 

اقرب لينا من انفاسنا.. 

و بعد ما كنا بنحتفل بالعمر ، 

بقت السما علي بالنا كل يوم و احنا بنحسب لها ألف حساب..

٦-سقطت اسطورة 

"الخناقات " .. 

بنتخانق مع مين و على ايه و ليه و ازاي ؟؟ 

لما اكتشفنا أن خلافاتنا على شوية أيام جريت مننا ، 

و ضيعنا العمر في الكراهية و الغل و الظلم ..

٧-سقطت اسطورة 

"بكرة " .. 

الاتنين بقي زي التلات و الاربع بقي زي الخميس .. 

كل يوم زي التاني مش لاقي حاجة اعملها غير شوية اكل و فرجة على مواقع التواصل الاجتماعي.. 

و كده بقي العمر بيجري مني و انا اللي كنت باضيعه من غير رسالة حب و خدمة تدي حياتي معني ..

٨-سقطت اسطورة 

"العلم " 

اللي كان فاكر نفسه يقدر على كل شيء ، 

بقي واقف عاجز قدام حته فيروس .. 

و العلماء اللي ياما شككوا في الله و كلامه ، 

و كسروا وصاياه و كفروا بيه و اتحدوا نظامه و خدموا الأخلاق، 

بقوا بيدعوه يعلمهم و يلهمهم المخرج من هذا الجحيم ..

٩-سقطت اسطورة 

"التأمين" .. 

ايه اللي بيأمن مستقبلك و مستقبل ولادك و بلادك ؟؟ 

مفيش غير ستر الله و حمايته ، 

و مفيش بلد محمية اكتر من غيرها ، 

و مفيش حته تهرب لها ، 

ده حتي السفر مش موجود ..

١٠-سقطت اسطورة 

"الدول العظمي" .. 

لا باسبورات امريكا و لا كندا و لا اوروبا نافعة ، 

و الطب و الحماية عندهم بقت اقل من عندنا ، 

و الشغل و المستقبل المشرق راح من عندهم و تساوت كل البلاد، 

كبير و صغير ..

كورونا صدقوني باذن الله  ح تخلص و اقرب مما تظنوا..

لكن اوعى  ترجع تاني بعد ما تخلص تصدق اساطير الدنيا اللي ضحكت بيها عليك و شغلت قلبك عن الله و حبه و خدمته و سماه و ابديته..

الخير و النور قادم و بقوة..ان شالله 

اوعوا تخافوا


#منقول #واتس