قصيده سالفة عمري

مساء الخيرات وان طال البطا يا المنزل المهجور     ترى ما ابطى بي الا حالةً مثلك يقدرها

اذا عندك عتب لا مانع من معاتب المذكور        واذا عز الرضا تفداك الاعذار ومقابرها

انا اللي جيت لك والريح تعوي والشتاء مسعور              ولابه من دفا والمربعانية باواخرها

تغير وانطبع دربك بلوم المسك والكافور        وهذي رعشة كفوفي ولابه من يدثرها

بعد ما كنت اجي بابك بدستور وبلا دستور  ولا ادري الا وذيك الدرفة اليمنى على اخرها

طموحي عارضته اللي معاها كل شيء يبور    وجاء كسر الطموح اهون من كسر خاطرها

سنة ما اقبل نذير الشيب كانت بأول الطابور     وكنت احلامها ذيك السنة وأول سرايرها

لقت قدامها فوضى وقلب شاعر وجمهور                وجات ورتبتني من جديد وصرت شاعرها

بقيت اسري لها لا همني وحشه ولا ديجور              أشيل احلامنا تحت النجوم وهي تفسرها

سقى الله يوم جابت لي قبل يومين من عاشور      هذاك العسجد الي جابه الله من ظفايرها

غلاها كان تحويشة عمر بشعور وبدون شعور        الين اكتظت الاشواق والهاني تكاثرها

ربت ما هي تحت ريشة نعام وفي بلاط قصور            ولكن لا ترف له قيمةً الا تحت اوامرها

يحملن امهات البيض تسع شهور تسع شهور               على رجوى بشايرها ولا لاحت بشايرها

تقل بدرً ولا بايات بدر تقول بدر بدور                  ولا بايات بدر بدور يعني ما انت خابرها

لو استقصوك عنها ما انت محتاج شهادة زور      تحت سقفك سحايب ملحها وامواج سكرها

ما آرق المتحف اللي من ورى ضلوعك فدتك الدور وانا ما اقوى نظر ما فيه بعد غياب ناظرها

حديقة بيت اهلها سورها العالي حمام السور           زخارف بابها,, شباك غرفتها,, ستايرها

ورق جدرانها ,, سجادها ,,, تقسيمة الديكور         خزاينها ,, هداياها ,, رسايلها ,, خواطرها

تحفها ,, مزهريتها ,, قصصها ,, شعرها المكسور  صورها ,, مكتبتها ,, اقلامها ,, لمة دفاترها

زمام السيف ,, شال الليل ,, حنا الكف ,, كحل الحور  حلقها ,, عطرها ,, فستانها الابيض ,, جواهرها

مرايتها ,, فصوص الساعه البيضا ام خمس سيور       خواتمها ,, قلايد جيدها ,, نقشات اساورها

ملابسها ,, بروق الوانها,, دولابها المعمور       من أزرقها إلى أحمرها إلى أخضرها إلى أصفرها

نسانيس الهوى الي يرتشف يشمومها المنثور           صخيفات المناديل اللي أحتضنت عبايرها

مصابيح المكان الي خذى منها النهار النور         سنون أمشاطها اللي ما نست عشرة ظفايرها

بطاقات يطرزها صغارً يحملون زهور                 رحيل الدبله الي ما تهنت في خناصرها

زوايا كنها بلور,, في بلور,, في بلور                  مساء رزنامةً غاب الحرير الي يغيرها

وش أقول ليتاماها الكثير الممتلين كسور            وانا أشياها تحاصرني واحسب اني محاصرها

بكيت وصارت الدنيا قفص واستوحش العصفور  ضحكت وملت شبوك القفص من كذب طايرها

عرفت شلون الارض ادور وايام الزمان تدور          والأعيان إن صفت كيف ومتى تذبح محاجرها

ومتى تصير القبور بيوت وتصير البيوت قبور           وكيف الذكريات يذوب ماضيها بحاضرها

على الله وانت ابيك المتحف اللي للعرب معذور      الا جتك العيون وصدت ابوابك نواظرها

تمر أجيال وتصدر سواليف وتعيش عصور              وتروي سالفة عمري من اولها الى اخرها

للشاعر المبدع/ ناصر القحطاني
-

---

.... مواضيع مشابهة أو ذات علاقة بالموضوع :