حاول تمتّع في حياتك وانا اخوك
ترى الحياة ابسط من اللي تصوّر
وش فيك كنك واطيٍ لك على شوك
في كل مجلس من ظروفك تضوّر
الناس سمّوك المجوّر وخلّوك
ماهم بجمعية علاج المجوّر
الجور جور اللي بالاسلاك مشبوك
لو اشبكوها بأعند الروس خوّر
والجوع جوع اطفال غزه وكركوك
والا انت بطنك كل يوم يتكوّر
غيرك كثير وكل مشروك مبروك
لكن قليل اللي مع الدرب فوّر
'
والخير مايحصر على ملية البوك
ونهر النعم لو تترك الشكر غوّر
والناس بالدنيا مماليك وملوك
شفهم تساووا بالمكان المسوّر
رصيدهم ماهو عقارات وبنوك
فيه الرصيد المعتمد والمزوّر
وإن كان غيرك بالتطور تعدوك
باللي يفيدك في حياتك تطوّر
واحرص على بر اكثر اثنين حبوك
واطلب رضى اللي للمخاليق صوّر
وحاول تفوق اللي بالأعمار ساووك
ومن التجارب في حياتك تنوّر
واربط علاقاتك مع الناس بسلوك
تراك لو تربط سلاسل تعوّر
وابعد عن اللي راسه اوهام وشكوك
وإن شاف له شي ماهو شي ثوّر
واللي يروح يروح ماهوب ممسوك
ما كل شي ضاع لازم يدوّر
والناس لو تفرق عن ابوك لاموك
افكار بعض الناس لازم تحوّر
لابوي ابطلع وانت تطلع على ابوك
كيف نتقدم بالطريق المدوّر
واترك طريق الشر لوكان مسلوك
وامسك طريق الصالحين المنوّر
وان جوك عشاق السوالف وغروك
احذر تسرع بالقرار وتهوّر
وثلاثة أشياء دونها الباب مصكوك
الدين وحقوق البشر والمعوّر
'شعر : :نايف_اباالعون
@naif_abalaon
ليست هناك تعليقات:
إرسال تعليق
أهلا بك ،
أشكر لك إطلاعك على الموضوع و أن رغبت في التعليق ،
فأرجو أن تضع إسمك ولو حتى إسما مستعارا للرد عليه عند تعدد التعليقات
كما أرجو أن نراعي أخلاقيات المسلم;حتى لانضطر لحذف التعليق
تقبل أطيب تحية
ملاحظة: يمنع منعا باتا وضع أية : روابط - إعلانات -أرقام هواتف
وسيتم الحذف فورا ..