هذه مختارات من ديوان الشاعر / محمد خلف الخس المطيري
بالله ياهـل البيـت لاتشلعـونـه=خلوا عيوني من حبيبـي تـروى
ثـم لاتهوزونـه تبـا تضربونـه=جعل اليدين اللـي تطقـه تكـوى
جلده حريـرٍ لـو تبـا تلمسونـه=مثل النفل لو تلمسـه لمـس ذوى
غروٍ نياشين الغـلا فـي عيونـه=يضحك ويشرلي على القلب جوى
يقـول هـذا لـك ولايقربـونـه=وابو الذي يزعل بعشرين ضـوى
وانا مليك ارضاه ماجـوز دونـه=قلبي معه في يديه من حيث موى
حيث اني افهم ماخفى من ضنونه=وادري بقلبه مـن قديـم وتـوى
واخشى عليه من العرب ينضلونه=انا اشهد ان اللي مسويـه سـوى
نبنوب مـوزٍ مايـلات غصونـه=عرقه من الجم الـزلال يتقـوى
والخد بـراقٍ تكاشـف مزونـه=مثل المشاعل في مقاديـم نـوى
عنق الغـزال مخلعـاتٍ متونـه=والثوب من فوقه عليـه يتطـوى
في خاطري مافالبشر مثل لونـه=مما خلق ربي مـن ادم وحـوى
الله على من شد مجمـع قرونـه=واكنع عليه وفـي رقبتـه تلـوى
وهذي قصيده آخرى لشاعرنا يامرحبا ياللي لك القلب مفجوج
يامرحبا يااللي لـك القلـب مفجـوج =عـداد نسنـاس الهبايـب ليـا فــاج
حطيت ريع بوسـط القلـب هجهـوج=ياعيـن حـر بالخضيـرا لـيـا راج
حبك طفح بي طفحت السـاج بالمـوج=ماعاد لي عن حبـك اليـوم مخـراج
اودعتنـي لاشـرب ولاكـل ولادوج=ولاستطعم المنطوق مـن كـل هـراج
لاغبـت عنـي دق بـي كـل دالـوج=قامـت تواردنـي هواجيسـي ازراج
قلبي يجينـي نـوج واضيعـه نـوج=يجيه مـن فرقـاك سجـه وسوهـاج
كن البنات الشقر عنـدي مـن الهـوج=ماكن به غيـرك علـى الارض دواج
عندي جميع السن بنات العرب عـوج=الا لسانـك فيـه لـي طـب وعـلاج
في هرجتك شئ من السحر ممجـوج=والنور مـن غرتـك يطلـع وينبـاج
وليـا ضحكـت بذبـل مابهـا فلـوج=مثل البرد مـن مزنـة تلعـج العـاج
واغضيت في سودن بها السحر مدعوج=ترسل سهوم الموت من حجره افـواج
تنثـرن شقـر مثـل كاسـي الغـوج=تاصل اليا ردف كمـا حـزف ديبـاج
جاني بـلا فالقلـب يسوجنـي سـوج=يتلنـي يمـك لـك الـروح تنـعـاج
كني اليا شفتك علـى انهـار وبـروج=والاملك شعبٍ علـى راسـي التـاج
واليا بديت بضحك وهـروج واغنـوج=قلبي غدا زبده على صالـي الصـاج
او مير كني بين الاضـلاع مخجـوج=بشلفا مثـل شلفـا غنيـم بـن فـراج
غنيم بن شبـلان مخلـن لـه سـروج=ليا صاح في تالي الرمك راحت امراج
تبـا تخلينـي مـن العقـل ممـروج=على العمـر شامـان تدرجنـي ادراج
ياروح روحي كـان مامنـك منتـوج=خف الغلا لاعـاد تحرجنـي احـراج
خليتني يازيـن الاوصـاف محـروج=صليـت فيّـه شـرق ماعـاد يحتـاج
لـو قلـت سيـر وخـذ عندنـا روج=جيتك على الاقـدام ممشـى ودفـلاج
اجـي وانـا مبهـوج واروح مبهـوج=ليا حصل لي منك لـو رفـة احجـاج
سبحان من سوى الاوادم من الحور
سبحان من سوى الاوادم من الحـور=انا اشهد ان الله هـو اللـي يسـوي
زولٍ خلق من نـور وبخدتـه نـور=نورٍ من الخالق ماهو نـور ضـوي
ادعج غنج خده بـه الملـح منثـور=تقـول بـدرٍ بـان بفتـوق نــوي
وعيون تذبح بالهـوى كـل منعـور=سودٍ مضاليلٍ علـى القلـب سـوي
نيشانهـن رمانـة القلـب ياسـرور=وحرابهـن مـن دم جوفـي تـروي
هو مسرفٍ فيه وانـا فيـه مجبـور=حبه ملـى قلبـي وجوفـي وجـوي
من زود حبه كن كـل البنـي عـور=لاغاب عنـي قمـت ادوج واهـوي
ابوجديل اشقر علـى المتـن منثـور=واهنـي مـن بيديـه فيـه متلـوي
ان كان شـدو يـم وسميـة الثـور=واحسرتـي لاقالـوا البيـت طـوي
وان مت من مركوز الانهاد معـذور=اللـي عليـه هالـزمـان متـكـوي
ولو هو عطاني صاحبي كبر الاظفور=قلت الدواء منك وعلـى الله بـروي
الله من قلبٍ عوى عوية الذيب
الله من قلبٍ عوى عوية الذيب=ذيب عوى لجت ضلوعه ولجي
عليك ياراعي العيون المهاديب=سودٍ مضاليلٍ وساع ٍ وبجي
سودٍ تشذب بسرة القلب تشذيب=طحت بخطرهن يالله انك تنجي
سهومهن تسطي على القلب وتصيب=تخج صندوق المعاليق خجي
ياصاحبي حبك لقلبي عواقيب=ارفق علي شوي قبل استلجي
يا اللي عليك عيون الامه مراقيب=تقول بين شفاك درٍ يمجي
والخد براق المزون المهاضيب=اللي رعوده رجت القاع رجي
يامنوتي مافيه شك ولاريب=منساك كود انسى صيامي وحجي
يابو نهودٍ شلعن مقدم الجيب=كمشمشٍ عرقه من الماء ينجي
من فوقهن شقرٍ تغذى على الطيب=ريح الشمطري في طرفهن يعجي
ذيل اشقرٍ ينسف خلاف العراقيب=تطلب عياله بالمهر والترجي
هزه وزرفات السبايا جناديب=لوما شليل السبر والمال هجي
ذبحتني ياسيد كل الرعابيب=فجيت قلبي يأريش العين فجي
فجن مثل مظراب شلفاء تراحيب=شلفاءاً تخل الدم الاحمر يكجي
لا وردة من كف مرو المغاليب=والخيل كاسيها ضبابٍ وعجي
ياعاذل المشتاق مابالهوى عيب=ماذقت لذاته عسى امك تدجي
لو ذقت من حلوه ومره تجاريب=مالمت طراد البني الغنجي
نجل العيون مزعلات الخطاطيب=شعوٍ عذاب مقطعين الفرجي
لو يحصل ليديك فيهن مقاضيب=مالمتني في حبهن والتهجي
يم الحبيب اللي هروجه تعاجيب=ياعين لديله ويارجل سجي
ياناس خلوني تراني تفجرت
يانـاس خلونـي ترانـي تفجـرت=ماطيعكم مير اقصروا الحكي عنـي
ياعاذلي كثـرت حكيـك وكـررت=نصـايـحٍ لاشــك مايقبـلـنـي
مهما حكيت وقلت واعلنت واسررت=اذانــي الثنتـيـن مايسمـعـنـي
انا بسكراتي من الحـب مافكـرت=وانته تبـي تشـره علـي تعذلنـي
لو يتهيا لي بوسط الفضـا طـرت=سويـت لـي جنحـانٍ يساعـدنـي
واليا بغيت اصل هوى البال سيرت=مـراكـز التفتـيـش مايمنعـنـي
اجيه لو اني على عمري اخطـرت=وربي اليـا منـه رحمنـي ظمنـي
ياصاحبي من زود حبك تدهـورت=منك الهمـوم الجايـرات اضهدنـي
نقلت حملٍ لو يحمل علـى الفـرت=شفته على الواحـد بحملـه يحنـي
عزرتبي يازين الاوصاف عـزرت=وانا بن عـمٍ لـك ومسلـم وسنـي
يحقلك ذبحـي لـو انـي تغيـرت=واليوم ذبحي وش تبـي فيـه منـي
اعطف علي شوي فـي ماتخيـرت=شـيٍ يخلـي خاطـري يرجهنـي
لو هو بشوفك بس منـاك لاسـرت=والا العلـوم الباقـيـة يقمحـنـي
يامورد الخدين من عمري اعـذرت=واسبابهـا سـودك اليـا سلهمنـي
هاك العيون اللي اليا شفتهن حـرت=تقـول فيهـن كهـربٍ يجذبـنـي
اليـا شفتهـن هللـت لله وكبـرت=اللـي مسويهـن وفيهـن فتـنـي
راكب اللي تقول مذّير ذاعرينه
راكب اللي تقـول مذيّـر ذاعرينـه=سامعٍ صقعة البندق وهـو مارمقهـا
يوم فـز وتشمحـط للمبنـدق بعينـه= حاذفٍ صفرة البندق وهـو مافهقهـا
وانصفق مقفي تاصـل لحيّـه يدينـه=لو يباري القطاه اللي تقلـب سبقهـا
اشقرٍ من نسـل شقـران متخيرينـه=من حرارٍ يعرفون الرجـال معمقهـا
اوصله شاعرٍ كل العـرب خابرينـه=كم بيوتٍ مثل نظم الجواهـر طرقهـا
هو حميد الرشيـدي كلكـم عارفينـه=المعاني مع اهل العرف يفتـح نفقهـا
سلـم الله رجـاه وسلـم الله يميـنـه=حيثه الكلمة العوجاء ماعمره نطقهـا
باغ ٍ اخبره فـي علـم بينـي وبينـه=الامانه غدت وامينهـا اللـي سرقهـا
لو حلف لي بوجدانه وربـه ودينـه=ما أقبل العذر لو انه بغيـره لصقهـا
وانت تدري لاشك الحق وينه ضمينه=وين حلال مشكلهـا ومـدّي رفقهـا
ياحميد الطرب والانس راحت سنينـه=مع سنين ام خمس اللي تشاعل فشقها
في يدين الـذي مضرابهـا حافظينـه=عند تال الركاب اليا تناضـح عرقهـا
في نهارٍ يفـر المـرء مـن والدينـه=تذهل المرضعه عن حملها من رهقها
يظهر الحق هاك الوقـت لمدورينـه=كانها طارت الابصار ممـا طرقهـا
واكرم الناس بالذمـه يهّمـل جنينـه= لو يبا كبـر حبـة خردلـه مانشقهـا
يالله العـن ابليـس وعالـمٍ تابعينـه=عالمٍ ماتراقـب ربهـا اللـي خلقهـا
الزمان اختلف والخلف من وارثينـه=والضمير انعدم والناس اخذها وذقهـا
لو تطالب بحـقٍ والعـرب شايفينـه=قيل لك فاتت الدعوى وشربت مرقها
واصبح الحق في وسط البحر حاذفينه=وان تكلمت يالرجال طالـت شققهـا
وانفتح باب حسادك على مصرعينـه=واركبت حصنها العالم وهدت سلقهـا
يامكافي تكافي شـر الارض ودفينـه=وإبعض الناس ليت الله سحقها ومحقها
كود من فيه خيرٍ جعل ربـي يعينـه=والبشر خلق ربي مير ربـي فرقهـا
فيه من ينفـع العالـم وينـدا جبينـه=وإبعض الناس ماودك تعرض شبقهـا
مير با قول بأعلى القيـل ياسامعينـه=واطلب اللي خلق سبع البحور وفلقها
جعل ربي يعز الدار مـع حاكمينـه=ديرةٍ كل من جاها شبع فـي شنقهـا
من فضل قايد الدولـة ومـا سابقينـه=شبعت الناس وارتاحت وربي رزقها
والحسد والنكد يرجع علـى فاعلينـه=والقلوب الغشيشه جعل يابس ورقهـا
---------------------------------------------
لولاك يالزين الصغير الفروعي
لولاك يالزين الصغير الفروعي=ماجيت من نجعي لهلك متعني
ياصغير الانهاد طيرت شوعي=دايم ورجلي يمكم ماتوني
عليك لونه من امك بشوعي=كن العرب تتنهبك وتغبني
في هرجتك لو هي قليله قنوعي=لو كان هرجك يسلب العقل مني
يوحيك قلبي قبل توحي سموعي=حتى العروق الجاريه يشهدني
حبك تخلخل مع مفالج ضلوعي=حتى بنوم الليل ماغبت عني
وان غبت عني يامليح الطبوعي=قامن دواليب الغرام يحدني
فقعت ثم قامت تسابق دموعي=مثل الخرز من رمشهن يمطرني
واقنب كما ذيب عوى عقب جوعي=واليا عوى معه الضلوع يعوني
لاقام يقنب في طويل الفروعي=ماشاف مخلوقٍ ولاشاف جني
ارض خلا مابه من الناس دوعي=بس الفجوج الخاليات يهوني
الذيب يقنب ماحصل له متوعي=وانا بلاي اللي بحبه شحني
راعي جديل فوق ردفه اشروعي=ذيل اشقرٍ شاف السبايا تعني
لاشافني زعلان ماعاد يوعي=ذولي مقابيلٍ وذولي يجني
يقول انا لك شايمٍ عن ربوعي=واقول مافاد الحكي والتمني
ما أنت متهيٍ لي لو احب كوعي=دونك حجاجير تحن وتوني
الا يجيبك من يجيب الرجوعي=مخلي الفياض الممحله يخضرني
او يأمر الله من يقود الجموعي=عبد العزيز الفيصلي يمتكني
وهذي قصيده آخرى لشاعرنا " صاحبي ناشني بالمودة نوش "
صاحبي ناشني بالموده نوش=نوش مسقًا تساعر بوسط الجاش
تلني تلت الركب للقنطوش=يوم قفوبهن شافهم حشاش
عوص هجنن عليهن مصطر غوش=وجههم كاسبًا والقفا منحاش
لاعني بالهوى لوع فرخ وحوش=واودع الكبد من سبته حمّاش
زين فوق المبيسم ثلاث رقوش=فوق خدًا يشادي شقاح الشاش
ان نطحه الهوى ضامره منجوش=وان قفاه الهوى شايفه ماعاش
وان ضحك بالرهايف يابو علوش=مت واعمري اللي خذاه بلاش
يوم احلي جديله شليل كروش=شافت السبر يومي على الادباش
ذيل شقرًا تكزه بوجه الهوش=كل ماامهلها بالرسن تهتاش
آه يامشخص الصايغ المنقوش=فاصلاً في حماره بياض قماش
مشخصًا صافيًا ماعليه عبوش =كامل الوصف مافيه قولت ماش
مرت عليّه يوم عيد رمضاني
مرت عليَه يوم عيد رمضاني=نبنوبتن مثل الجنيه ادهشتني
قالت صباح الخير يامودماني=قلت الحياه ابغرتن صبحتني
اول سلام معاقبن باليماني=بصابعن مثل الذهب خامستني
قامت تبسملي بغر الثماني=حتى على الموت الحمر وردتني
تضحك بغرٍ كنها القحوياني=بشفيها ذوب العسل لو عطتني
في خدها الموت الحمر له غواني=بعيونها اللي ساحره كهربتني
اموت واحيا بين عشر الثواني=لارقرقة بعيونها واخزرتني
خزرة غلا في ضحكتن بغنجاني=منها حياةٍ لي وفيها اجرحتني
تظهر لي رموزن تحشر احشراني=فيهن نياشين المحبه دعتني
لا شفتها قلبي يروج اروجاني=وين اعرضت ليه وين انطحتني
لولاه تردعها الضلوع المحاني=كان الحياه مع العرب فارقتني
وهذي قصيده آخرى لشاعرناالحب بلوى واكثر الناس بلوى
الحب بلوى وأكثر النـاس بلـوى=وأنا دليلي يأهـل العـرف عينـي
القلب ماله في سميـره وسلـوى=لو أكثـر العالـم لهـن ميدينـي
مالي بعض الصيد عسـاه يلـوى=ما ينشرح له خاطري لو يجينـي
القلب شفه فـي عماهيـج علـوى=نجل العيـون مهلكـات الجنينـي
اللي مجاذبهن من طيـور شلـوى=مرويـن حـد مذلقـات العرينـي
لا جا الدلع يا بوش والحكي حلوى=لو كان قلبك مـن صفـاةٍ يلينـي
ملزوم قلبك يجزل اجزال دلـوى=لا جتك تمشـي تنعـط عطفتينـي
والرأس ذيل كروش ما جت بفلوى=شقـراً تكـم معيـلات القطينـي
لو قابلت لك في هـدوم سملـوى=تغنيـك عـن نزالـة المشرقينـي
هلا هلا يأم العيون المظله
هلا ... هلا يأم العيون المظلـه=اللـي بعينـي مالهـن حـلايـا
فيهن تقول طـراد خيـلٍ وسلـه=اما هـل الـردات والا الطنايـا
لا احذفو عـن المهـار الأجلـه=وردوا لبيـضٍ كنهـن الحنـايـا
ورداتهم تشفي القلـوب المغلـه=من غير حقرانٍ لباقـي النحايـا
يا بنت من ينطح وجيـه المهلـه=زيزوم عيـراتٍ ومقـدم سبايـا
مع دربه العيرات مثـل الأهلـه=دايـم سماريهـن تتالـى حفايـا
العذر منك اني فلا قلـت زلـه=لا طاب حظ مصورين الحكايـا
ما فيك ما ينقال فـي كـل ملـه=وعذروب أهلك يعدلون السرايـا
والزين فيك أحلا الوصايف مدله=مالك بغضـات الصبايـا تهايـا
شمسٍ على روس النوازي مطله=شعاعها يرسـل سهـوم المنايـا
لا بانت الغـره عليهـا اسـم الله=بأطرافها تقـل يتكاشـف مرايـا
مثـل البـروق بمزنـةٍ مستهلـه=توضي وكاسيها أشقرٍ له زوايـا
ما شفتهـا الا ساعـة مستزلـه=يوم العياد ويوم ذبـح الضحايـا
فالماقع اللي شافها النجـع كلـه=تلعب نهار العيـد بيـن الصبايـا
بحجاجها سيفٍ من الهنـد سلـه=تشرق وترهق موسعين الهوايـا
فأن كان هذا سب أنا راعي لـه=يا سيـد كـل مفلجـات الثنايـا
وانا ما أسب الناس طبعي جبلـه=لو كان أشوف الناس تمشي عرايا
إلا ليا جـاء شاعـرٍ فيـه خلـه=مضيـعٍ دربـه وعنـده نـوايـا
اعطيه علـمٍ ليـن دربـه يدلـه=واسنعه بالـي يسـوق المطايـا
هذه قصيده لشاعرنا وهي تعبّر عن نفسها
الشيخ لاقام يتهرّب عن الناس=تراه مع ورك المطيّه تدلى
لوهو ولد شوخن بعيدين الارماس=اليا استهان بحق الاجواد ولى
لاجنّب الواجب ودلبح مع الساس=وانحاز مع بعض الوجيه يتسلى
مثل الجمل ماعنده شعور واحساس=اليا ملا بطنه تياسر وفلّى
واللي يبيله سمعتن ترفع الراس=يرقابها روس العلا ويتعلى
ياخذ مثل سلمان بالطيب مرواس= مشرّع البيبان في كل حلاّ
لاجيت بيته شفت من كل الاجناس=تشرب وتاكل والمخابي تملاّ
ينسف على العالم ملايين الاكياس =واللي مكذّبني يجي ويتحلى
ذولا مصاديرن وذولاك جلاّس=مثل الورود اللي تعطن وتعلى
هذا الذي بالطيب ماهوب ينقاس=اللي على طول الدهر مايملا
شيخن نظيف العرض من كل الادناس= مزبّن المظيوم ريف المقلاّ
زودن عليه بقوة الراس والباس=عوق العديم اليا غلظ واستجلا
الله يجيره من صواديف واتعاس= حيثه علينا مثل قيفن مظلا
والا خطاة الشيخ جعله للافلاس = بخيل ورزيل وجامعن شين دلاّ
اليا ذلف ذلفة دهام بن دوّاس= اللي عن الديره واهلها تجلاّ
يقولون قلبك دايماً للقنص يتوق
يقولـون قلبـك دايمـاً للقنـص يتـوق
وانا اقول هذي رغبـةٍ لـي وعاشقهـا
انا ليّ رغبـه والصقاقيـر فـن وذوق
يعرف الصقار مـن عشقهـا وتشبّقهـا
وانا رغبتي وهوايتي شي يـا مخلـوق
هوى البر في غرب الديار ومشارقهـا
ليا جيت روضٍ فيه مختلـفٍ الزملـوق
نبانيـب نبتـه ناعـم الريـح يطرقهـا
مساقيه نوٍ ممطـرٍ بـه رعـد وبـروق
تهشـم مزونـه فالوطـا ليـن يغرقهـا
عقب سيلة العشب يتعـلاّ نباتـه فـوق
تشوف الفياض من النبـات وتضاوقهـا
تشوف الزبيدي كنه المـرو فالرقـروق
والأشجار ظاهرٍ الزهـر مـع مفاتقهـا
ليا دجت فيه عصير والاضحي شـروق
يونّسك شـوف البـرق فيـه وتخافقهـا
وانا في يـدي شيهانـة جنسهـا يلـوق
لو الخارم المقفي على الخفـو تلحقهـا
ليا ظفت الجنحان كن السمـا مشقـوق
سوات السهم والعين مـا عـاد ترمقهـا
عليها اطيارن يبهر الحاكـي الصـدوق
وفعـلٍ يحبـب فالشياهيـن وطرقـهـا
ليا شقّت الداغر على القلب والمعلـوق
تعجّـب ولله العجـب يـوم تشلقـهـا
اناستك ياراع الولع جعل مالـك عـوق
لعـل السلامـة فـي حياتـك ترافقهـا
أخذ فالقنص ياللي تحب القنص غدروق
ترى ونستك في آخـر حياتـك تشفّقهـا
يقوله لك اللي ما يبا شربـة المطـروق
عسى الله يوسعهـا لنـا مـا يضيقهـا
لياجيت قاعٍ عشبه طبوق فـوق طبـوق
تساقيه سحـبٍ كـن الأنهـار مدافقهـا
ما والله اغبط اللي يحبون ظول السـوق
ولا أحب ادوّج فـي الديـار وحدايقهـا
احب المطر والخيل واحب شوف النوق
واحب الهنوف اللي تكاشـف عواتقهـا
ليا صار مـع جمالهـا عقلهـا ماثـوق
ليـا شفتهـا تقـول سبحـان خالقـهـا
عيون المهـاه وعاتـقٍ مـارقٍ منتـوق
وخدٍ كما شمس الضحي فـي تشاعقهـا
تبسّم ابيـض ذبّـلٍ مـا بهـن فـروق
كما الحص مـن محـارةٍ يـوم تفلقهـا
ليا شفتها قام يحدانـي عليهـا الشـوق
ولوهو بكيفـي كـان والله مـا فارقهـا
لجّود معضّ الذيب حاضر ما هو مفهوق
واشم الخدود اللي كما الورد وانشقهـا
هذي رغبتي وهوايتي والاّ العمر ملحوق
ولي رغبةٍ في الحر الأشقـر محققهـا
واحب اللذي به لون من ريشة الغرنوق
به الميزة اللي راعي الصنـف يعشقهـا
اليا صار فوق الوكر ماكن فيه سبـوق
سراويلـه تغطـي كفـوفـه ذلايقـهـا
عذاب الطيار الخارم المقفـي السبـوق
ليـا شافهـا مافادهـا طـول سبّقـهـا
اليا من لحقها فالهوى ساق روحه سوق
كما سوق ميراجٍ عطى النـار سايقهـا
ضربها بمخلابٍ يخـلاّ العظـام فتـوق
فراها ومـن حرصـه تنكّـس وعلّقهـا
وعطيته من الداغر نسـورٍ يذوقـه ذوق
علشان يرمـز لختهـا حيـن يرمقهـا
ليا صادها اللي لاطرد مرهـيٍ بلحـوق
بقـاعٍ خضـاره كـل عيـنٍ يشوقهـا
هزعت وشعمت النار فالحاجر المرموق
وخوياي ربـعٍ تعجبـك فـي طرايقهـا
نشاماً توسّع خاطر الضايـق المغلـوق
على المرجله والطيب عجـلٍ تسابقهـا
يجي شغلهم لاهـو بنـيٍ ولامحـروق
تسوّيـه أيـادٍ جعـل الالـه يرزقـهـا
قصيدة اسندها الشاعر : نغيمش الزويكي لشاعرنا
يامحمـد خلـف يالخـس يالاستشـاري
ياطبيب الهوى البستان وانـت الخبيـري
اسند العلم لمن يسند خصيمـه اجبـاري
والله انـك استـاذ الشعـر والاميـري
عطني العلـم يامحمـد ووقـع قـراري
انت ونعمسـت الاريـا عليـه شويـري
عطني الكلمـه اللـي ماعليهـا غبـاري
كلمـةٍ نعتمدهـا منـك تبـرد ضميـري
من عرفتك تعطينـا القـرار الـوزاري
انت اخوي الكبيـر وتعتبرنـي وزيـري
انت شاعرمطير وكل مـن كـان داري
مير بعض العـرب تذيـك تاتستشـري
وان تحرك جناح الحر صـارم حبـاري
ليا كفخ في جناحـه خولبـت ماتطيـري
والمقاسيـم يالبسـتـان رد اعتـبـاري
والتجارب تبيـن لـك قليـل وكثيـري
والمقاديـر مقسومـه مهـي باختيـاري
مايقدر على المخلـوق بامـر القديـري
والمغازي بها مهـزوم والا انتصـاري
ودونها الدرب يامحمد غرار وعسيـري
وانت لك وقفةٍ يابـو خلـف واقتـداري
والنشامـا تخـلا للنـهـار الكبـيـري
وانت لك عند كل مطيـر قـدر وقـاري
دايـم الكايـده يالخـس فيهـا قديـري
لاتخلـي رفيقـك ماتفـيـد الـعـذاري
انت من روس علوى ملحقين الكسيـري
من زحازيـح ربعـن يامحمـد خيـاري
يذبحون السميـن ويحتمـون القصيـري
يامحمد على الاجواد تجـري الجـواري
ولاتنجت في غيـرك ولالـي سفيـري
يامحمـد بـلا قلبـي علـومٍ كـبـاري
حرقت في ضميري وانت عون وبصيري
ودي اشرح لك القصه بكل اختصـاري
واتسمع مـردٍ منـك جـزل وجديـري
من غلا عيطموسن طال معها انتظـاري
فوق عشر سنوات وش عليـه تشيـري
شاحنـي وابتلانـي بالمحبـه اجبـاري
اجبر القلب في حبـه وغيـر مسيـري
شاحني شوحة الورعان لعظيـم سـاري
قام يلعب بقلبـي لعـب ورعٍ غريـري
لاتحليت عيوني فيـه قصـف العمـاري
منين ماجيه واحوفـه جمالـه غزيـري
اليا تمعنت يدخل فـي سمـاره شقـاري
ياهل المعرفه فيـه الموصـف يحيـري
لونه اشقر وفيه شوي مثـل السمـاري
ياكبر حـظ حواشـه وحظـه كبيـري
ياجمال عليهـا مـا يوصـف وصـاري
مايخليـه مـن شافـه ولوهـو فقيـري
واهني من قطف منهـا جديـد الثمـاري
ياعيون الوحش والا الغزال الصغيـري
زين ذاك المبيسـم والثمـان الصغـاري
فيه من وصف قيس ومايقول السديـري
ياصغيرٍ ملـك قلبـي وغيـر مسـاري
ناعم بالحضاره حيل واصلـه مطيـري
لو يشوفه عميد الدين صـار انتحـاري
شبت النار في جوفه سـوات السعيـري
صاب قلبه صوابٍ بين الاضلاع فـاري
يودع اللي يصيبـه حولهـم يستديـري
اه يامن خذت عقلـي وقلبـي جهـاري
الضحى بالنهـار ولال حبـه خشيـري
لاضحك شفت فيه من المحبـه مـواري
وان تكلـم بنغماتـه خلطهـن عبـيـري
كـل ماشافنـي عينـه تهـل العبـاري
فوق خدن غشاه الملـح ولونـه نويـري
ومثل ريح النفل لانـج حـول الخبـاري
بـول النبـت واللقـاط يلقـى هبيـري
او كما ريـح عشـبٍ نابتـن بالمـذاري
بان عقب الطلوله صبـح والا عصيـري
لو تشوفه قضاة العلـم حـط استشـاري
ولو تجي قاضي التميز عقلـه يطيـري
يختلـف مايميـز فيـه تسعيـن طـاري
مايميز قضايا الناس لـو هـو شطيـري
وانتهت عد ماهبـت هبـوب الـذواري
بالصـلاه وسـلامٍ للبشيـر النـذيـري
رد شاعرنا على الشاعر : نغيمش الزويكي
يانغيمش يابن تركي كفيـت الخطـاري
يالزويكي عسى شرك ماهو مستطيـري
يابن تركي عن اللي فيك مانـي بـداري
جعل رب السما لك يالسنافـي يجيـري
احسبك قبل تقرا فـي كتـاب البخـاري
واثر عينك على الغالي تهـل العبيـري
عذبنـك بنـات مطقعـيـن الـبـراري
مثل ماعذبـن قلبـي وحاسـن مريـري
خلن القلب له بين الضلـوع افتـراري
مثل ماصاب قلبـك والمقـدر يصيـري
وكم شجاعٍ يحل المشكـلات العسـاري
ان خطرته سنافي وان حربته ضريـري
لو هو يعدل الفرسـان فـوق المهـاري
لاعطنـه محبـه فـر قلبـه فـريـري
وانت مثله تراقـب للنجـوم السـواري
بين حبل الرجا والياس قلبـك حسيـري
سون البيض فيـك الغاويـات النكـاري
خدرنك من الحكـي الرقـاق تخديـري
لك سنين طويله وانت مانتـه بصـاري
مونسٍ لك غلا ماهـو بحـب الدشيـري
تقتلب وانـت لابايـع ولاانتـه بشـاري
والسبب ماحصل تقرب حوالا السريري
يمكن اللي حـداك انـه كبيـر نيـاري
او عجوزٍ ليا شافتـك تزحـر زحيـري
مانت الاول ولاالتالي تصيـر انحـداري
قبلك اللـي يـردون الكمـي للمغيـري
متعبين الركـاب مقولمـات السمـاري
يم بوش الحفيف اللي مغـب وصديـري
جنهم وارثعن فيهـم بصبـح وغـداري
ناهبات القلـوب مدوجـرات النشيـري
لين خلن بعضهـم فالنـدم والحسـاري
في نهاره يلـوب وكـل ليلـه سهيـري
غير هـذا حـذاري لاترافـق حـذاري
الـذي فيـه شبهـه لاتحطـه عشيـري
كان حبك فهو حبـه سـداري مـداري
لو يبا يقدرك هلفـاك فـي كـل بيـري
رافق النشمي اللي مثل طيـر الغبـاري
يذبـح الدارجـه والطايـره ماتسيـري
وكانك اعلنت يانغيمش ببعض الطـواري
ماتوقـف ولاخليـك هـذاك غـيـري
مايخلـي رفيقـه تفترسـه الضـواري
كود خطوا الحمار اللي يعـط النثيـري
اجزم اني معك لو هو بضرب الشباري
والعدو ياولد تركـي ضعيـفٍ حقيـري
واكتم السر بعض الناس مالـه ريـاري
ماسمع منك قالـه جعلـه الله غضيـري
لاتخلي عدوك منـك يضحـك شغـاري
الزم الصمت لين انـه يقـر القريـري
وبعض الخيل يقصر عن قودها المباري
ماتهيـا لشـوخ وحـظ رجـل فغيـري
ماتهيت لخو جوزاء وبرغش وضـاري
ولاقضب حبلها ابن سويط شيخ الضفيري
والعرب خلوا النعرات هي والحمـاري
واكثر الناس رد السيف وسط الجفيـري
وام خمس تركوها الاولـه والسـواري
وام ركبه ودهـم يزعجنـي الذخيـري
قبـل مافيـه لاندكـروز والا سفـاري
فيه شلفـا علـى قبـن لهنـه عريـري
يوم توحي بطـراف السبايـا الثمـاري
فـي نـهـارٍ عـبـوسٍ قمطـريـري
وبعض البيض في مركاض ابوها تماري
يطلق الوجه عنـد معطفـات الدريـري
والضعون يحماها من جميع الخطـاري
والسبايـا ليـا جاهـا تقافـا صريـري
وعقبها رغبتـي وهوايتـي وافتكـاري
يصبح الجو هـادي مايطيـر الذريـري
والشعر مثل نهرٍ دايـم الـدوم جـاري
ماتعبـره سبابيـح مـداهـا قصـيـري
احـدن يقطـع الانهـر بليـا كـبـاري
واحد كل شعره مثـل حيـري وديـري
كل من يسمعه عليه عليـه ناقـد وزاري
مير من يقنعه حيث انه اعمى بصيـري
يبلش الناس في كثر الحكـا والهـذاري
ادمي مير قلبـه مثـل قلـب البعيـري
ان نصحته بلشت وهو من العقل عـاري
وان تكلم ليـا بيـن الرغـا والهديـري
والمثل قال بعض الناس خيبـة دبـاري
لايضرك ولاينفعـك عظمـه هشيـري
وعادتي من قبل ماحب كشف المعـاري
من عرفت الحيا والشعر هـذا مسيـري
وكلمةٍ تزعل الاصحاب يابـو مشـاري
مانبيهـا ولافيهـا مــن الله خـيـري
والسنافي على راسي ماأحطـه يسـاري
وان تغير مسيره قلت يارجـل سيـري
قصيدة الشاعر المرحوم : مفرح الظمني التي اسندها
علـى عـدة شعـراء ومـن ضمنهـم شاعـرنـا
الله من قلبً همومه وطنه
كنه يسمر في ضلوعه مسامير
ياطارقاً نجر الهوى لا تدنه
جورك عليه يكسر القلب تكسير
واعزتي لسعود من كبر سنه
عنه انتحى عصر الصبا والغنادير
في مامضى غيد الصبايا يبنه
واليوم ماله من وراهن مشاوير
حتى ابن هادي بالعيون احربنه
تغيرت لفتاتهن والمضاهير
ماكنهن عقب الغلا يعرفنه
راحن على ريف النشاما مناكير
والخس في قلبه من الحب لنه
مركز دفاعه بين هدمن وتعمير
والى نشدته قال قلبي خذنه
يامن ذكر لي وردهن والمصادير
وصحن الى شفته مع الناس كنه
بين الرجا والياس يرسل مداوير
يطحن غرامه والهموم طحننه
يشكي على دبيان بعض التدابير
اقفى جديد العمر مافيه منه
اقفاي عشب جاه صيف ومعاصير
كنت مزونه والسمايم شونه
وابعد ثراه ويبسن النواوير
ليت الليالي ماخذن رجعنه
ينشاف زمل مدوجرات البواصير
يوم الحطب بحبالهن يجمعنه
بين الفياض وسانحات الدواوير
راع الهوى لو مايجيهن يجنه
والشك زايل والطوارف مسايير
والى لفاهم طارشاً ينشدنه
عينت ماعينت من غير تقصير
والى تلافن من ربيعاً قضنه
تقابلن مقطانهن بالتباشير
والعصر غالي لبسهن ينشرنه
بين البيوت وبين ورادت البير
يازين صب الدلو بقدورهنه
قدام ترو مرزمات المعاشير
مافيه رادو بالغنا يسمعنه
وإلا جهازً يختلف بالتصاوير
بس المدوه يوم للبوش حنا
وقولت ياراع السانيه بالمحادير
راع المحبه بالنظر يشغلنه
تنشق دلوه بين روس المناعير
كم عاشقً بخدودهن صوبنه
ومعكرشاً فوق الردايف دعاثير
على العبس ومن الشمطري غذنه
ماقصصوهن عاملين الكوافبر
واليوم وقتاً يوذي الناس فنه
عشق الهواتف والصور والمزامير
وسعود صاح وتالي الصوت ونه
ومحمد اخفى صيحته بالمعاذير
أبو خلف عجف السنين محلنه
يومين وألا يذكر البيض بالخير
طشوا كلايف جيشهم والأعنه
ماعاد قالو درجوهن مغاوير
يارب بدل نار الايام جنه
واغفر ذنوب اهل الوجيه المسافير
رد شاعرنا على الشاعر : مفرح الضمني
ياللي تدن النجر دنه ورنه
خله يجضور من غرامه تجضوير
حنا هله كان اليدين أطلقنه
الى منها قلة عليه المعاسير
مايملكن أيدننا يخرجنه
من قبل لا تكثر علينا الدنانير
لاشك بعض ربوعنا مستجنه
قاموا علينا يطلقون الحناجير
أشوفها من غير لنه وهنه
قامت تفجر بعض الالغام تفجير
جتنابهم خيل الفسق مستعنه
مدري وش المقصد ورا مطير لمطير
حنا نسايرهم على حسن ضنه
ونسامح المخطي معزه وتقدير
والى تجاهلنا خطاهم محنعنه
قالوا بلاهم خوف والا معاسير
الخوف منه قلوبنا مطمئنه
ماهمنا شلفا ابن غانم ولا الزير
أن ألتفتنا للسباع المسنه
تبي تصير الشلف حدر القناطير
أخير للدنيا تجي مرجهنه
قدام راع الكير ينفخ على الكير
أن كان جت بالشعر حنا مغنه
حنا مصخرت التماثيل تصخير
لو نلحق المشقاص قوماً مرنه
فرت بعض ناساً فرير العصافير
الى فتحنا باب شعراً نكنه
يسلمانا الكافر ويركع لنا الطير
والله يالولي خطو رجلاً نحنه
لا اقلب عبى ناساً هنيا مخامير
لا اسن فيهم شي ماحدن يسنه
شياً نجيبه مقطعه من زمهرير
يابعضهم ياعضاه ماينهضنه
وانه لينكل عن جميع التهاتير
لاشك جتنا من ربوعاً مضنه
سوالفاً ماعرف لها كل تفسير
أقربهم مفرح هجوسه عصنه
شغل تماتيكه على غير تعيير
يوم البيوت اللي بنى شجعنه
أذاعها بين الدول والجماهير
وادلى على ربعه بشياً يضنه
يقول اشوف الشيب فيكم مغاتير
والشيب ياراع التماثيل سنه
ماعذرب اللي ينطحون الطوابير
حمّاية القشرى ثبار المدنه
الى قبلن ذولي وذولي مدابير
الشيب مابه عيب لاتحسبنه
العيب من جنب طريق المناعير
من شب شاب ولو سنينه عطنه
والشيب في وجه الرجل زود تقدير
وأن كان به عذروب مافيه منه
أنته نزلت مع الرشا لأسفل البير
عودٍ وجسمك يقرع اقراع شنه
تبي تصيغر وانته اكبر من النير
هرش الحضيره باركلّه بعنه
ثاوي وعينينه بالامه مطايير
الى شاف من تمشط شعرها بخنه
قام يتلفت وارزم ارزامت بعير
يبي السنين اللي مضن فاختنه
أيام ورد الماء ولبس المقازير
يومنهن بعيونهن يفتننه
نجل العيون مزعلات الحجاجير
اللي كما ارقاب المها ارقابهنه
تقول فيهن مثل ماياصف عمير
كن العسل في مفلج عذابهنه
والموت لامن دلعن بالازارير
كنك تشوف الماء ورا حلوقهنه
ونهودهن حمرن وفيهن دواوير
مثل ابو فيصل بالهوى يشعفنه
لاشك اضن الزند مافيه تشرير
واليوم فارقهن وهن فارقنه
لو انه اغلى الصبغ عند العطاطير
وهذي مجاراة شاعرنا لـ سعود الوسمي بقصيدته شيخة الغزل اللي يقول فيها
انا لي ثمان سنين اجامل وانا مجـروح
اكن الموده داخـل الصـدر واكتمهـا
سمعت الحمام اللي سجع فوق غصن الدوح
جذبني بنغماتن هل الحب تفهمها
تغنا بشعرن من شذاه العطور تفوح
يعطّر مسامع من سمع في ترنّمها
من الشاعر اللي قبل انا لاامدحه ممدوح
وكد قالوا الاجواد ماتهفي ذممها
غنيّن عن التعريف ازيد الوضوح وضوح
تباها به اشعاره يصخّر ملاحمها
عميد القصيد وفي عيون العدا ذرنوح
وهو الاديب ونفسه الرب ملهمها
شعاني وانا قلبي مع اهل الغرام ايتوح
هضمني وروحي قبله الحب هاضمها
جبرني ابوح وعادتي للخفا مااابوح
اداري عن السمعه ونفسي مشيّمها
اجامل وانا قلبي بسيف الغلا مصطوح
اكن العباير في ضميري وكاظمها
هليك ودريك ادوّر من البلال انشوح
وكبدي تفوح وبارد الشرب يلطمها
غديت الغليث اللي يخاف البروق تلوح
يسوج ويلوج ونفسه الغلث مسقمها
سبايب عنودن صار في حبلها ساموح
حرمني محجّرها وهي مثلي احرمها
علامه يفرّقنا لعله ماهو مبيوح
بنينا الامال وحاقد القلب هدّمها
ولاله مصالح بس غاد الجدا مشفوح
مسممّ ونفسه زايد الغيض سممّها
حقود وحسود ومسردن كنه النابوح
وذلوله على كل المغازي يدرهمها
عسى الله يلم الشمل بالصاحب النصوح
وتطيب النفوس اللي محيمه حوايمها
وتليم شفوف اهل الهوى والعدو مكبوح
وتلحق هواها المغرمه لجل مغرمها
تهيّا على وضح النقا دربها مبروح
انال الهنوف اللي ولامي موالمها
ويبرا فوادن من غرام الهوى ملحوح
لحاه الهوى وارثع بروحي وحطّمها
وتخايط جروح بداخل الضامر المشلوح
من الجادل اللي حاكمتني وحاكمها
هنوفن عيوفن من تولّع بها مسموح
كساها الحلا من الراس لاحد مقدمها
غنوجن عنوجن بهرجها للعرب سحوح
فتونن يضيّع كلمته من يكلّمها
بها من مهاة الريم غره وفيها لموح
تذوب القلوب بنارها ماتقاومها
عليها الله اكبر كيف جاحت فوادي جوح
بها النفس مرهونه ولاني بلايمها
تمركز غلاها غصب ماعاد هو ممسوح
ولاعاد لي سلطه على النفس ايممها
انا صاربي ماصار للخس ياملّوح
طواني هوا خلن طوى الحال واعدمها
خليلن تخلخل خل عقلي وشاحه شوح
عزلني عن العالم دها النفس واوهمها
خطاها كبر سنجار مير الخطا مدموح
لعل وعسا ترحم وذا من مكارمها
قصيدة اسندها الشاعر المرحوم :
سحلـي الـعـواي لشاعـرنـا
يازين شب النـار بـأرضٍ بياحـي
والزول يزميلي على مـد شوفـي
والبيت مبني والرعايـا ضواحـي
وانته تمشى مع نبـات الحروفـي
اخيـر مـن ذبـحٍ بليـا سلاحـي
بقبورت الحييـن مثـل الضعوفـي
ببيوتنـا مثـل الدجـاج المداحـي
مغير يـم السـوق ناخـذ ونوفـي
يابو خلف مامـن تجـدد مراحـي
متشفـقٍ عقـب الشـداد الردوفـي
يابو خلف صاحي ولاني بصاحـي
بس اتلفـت مثـل راس الخروفـي
خروفٍ أدلـم مايعـرف المتاحـي
وراعيه جابرتـه عليـه الظروفـي
ابكي على وقتٍ حظرتـه وراحـي
اتـلاه يامحمـد زمـان الكسوفـي
ياحيف ويـن مورديـن الرماحـي
اللي نهار الكـون تـرو السيوفـي
يالخس وين مطير هـاك النواحـي
سلفـان مثـل مزبـرات القنوفـي
تسايـروا ثـم صوتـوا بالفلاحـي
هيهات ياما فرقـوا مـن شفوفـي
خذتهـم الدنيـا هجـاد وصباحـي
وحنا بقينا عقـب هـاك الصفوفـي
صار العوض فيهم خطات الضياحي
ياعنـك ماكـدٍّ عليـه مخلـوفـي
يالخـس يومنـه تكسـر جناحـي
ماني على الدنيا كثيـر الحسوفـي
اليـوم موتـي والحيـاة متواحـي
يابو خلف منكف وعايـف وموفـي
اليـا ماتهيالـي غـزال البراحـي
مالـي بصيـد مخبطـات البلوفـي
يابو خلف ذا منهجـي واقتراحـي
وانته علـى رد المثايـل عروفـي
رد شاعرنا على الشاعر المرحوم :
سـحــلــي الـــعـــواي
ياسحلي العـواي منتـه مباحـي
ياللي تقول انك حوالا صفوفـي
الفرق واسع للسنيـن امتراحـي
قدام اجي وانته تغيـر وتحوفـي
لاشك معي انته تحب المزاحـي
وزلتك عندي يالسنافـي تطوفـي
وتقول انا يالخس ماني بصاحـي
واقول منته بصاحي ومهروفـي
ياللي تبي وقت له سنين ماحـي
يوم القبايل بيـن امـانٍ وخوفـي
يوم يحدا الخيال قـدم الطياحـي
والوقت زين وبأهل الوقت نوفي
يوم اصطفاق أمصمات اللواحـي
فج الزغون مقولمـات الخفوفـي
مركوب فرسانِ تبـوج الفياحـي
دايم لوجه الله عليهـن ضيوفـي
دايم يتلّـون النّضـى بالمشاحـي
ايضا ومعهم كـل قبـاً شعوفـي
اليا طالع السّبار شعل وشقاحـي
قالوا عليها ماسمعـت المعوفـي
مافعلهـم بالهندسـة والمساحـي
بالسيف الاملح فعلهم والكشوفـي
كم فارسٍ منهم تجنـدل وطاحـي
اليا جودوا خضر النمش بالكفوفي
مايطلبون الرزق عند السحاحـي
الرزق بيدين الرحوم العطوفـي
ارزاقهم حدر الدّخن والصياحـي
مثل السباع مـدورات العلوفـي
كم رفرفت راياتهـم بالنجاحـي
واليوم وقتٍ راح جعلـه ذلوفـي
يابو فهيد اسحب ذلاق الشّلاحـي
الجيل الاول له عيـالٍ وقوفـي
يامابهم من جمّ ماهـو ضحاحـي
لـولا اليديـن معقبـه للكفوفـي
مطير في ديرة طيـور الفلاحـي
اللي بهم عزّ وذراء ومعروفـي
بين السعود وبين نسل الصباحـي
في نعمتٍ مامثلهـا بالوصوفـي
شبعة وأمان وراحتٍ وانبطاحـي
ومنين ماوجهت جبـت الولوفـي
قصيدة اسندها شاعرنا لاخيه الشاعر الكبير :
صــحــن بـــــن قـويــعــان
ياصحن دالهٍ عـن مترفـات القبايـل
لين جاني من أرهقنـي ونكـد عليـه
قام يضحك ويجذبني وجيت متهايـل
ليـن مفتـاح قلبـي ضيعنـه يديـه
مثل ماضاع قلبك بالسنيـن الأوايـل
يوم تشري الهوى بالذمـه العامريـه
انت تدري وعنـدك للمحبـه دلايـل
كل ماخض ماء بالحوض ترد الضميه
لاتسايـل ولاتنشـد وخذنـا القوايـل
رغبة النفس ودتنـا حيـاض المنيـه
ياطبيب الهوى حنـا لقينـا الهوايـل
نظـرةٍ النـاظـر لـهـا جاذبـيـه
ماتميز من الخـده شقـار الجدايـل
اشتعـال البـروق بمزنـةٍ عقربيـه
خده اشقر عليه اشقر للـردف مايـل
فيه نورٍ وبـه نـارٍ تطـارد سويـه
مثل عنق الغزال اللي بوسط الجمايل
يوم فز وتشمحـط موحيلـه اوحيـه
كن جوهر عيونه ياصحن يوم اخايـل
حد سيفٍ شطير او خنجـرٍ نافعيـه
وان تبسم ببيضٍ بين حمـرٍ عسايـل
بايحوني تراني مت ابكتـب وصيـه
ويرد اخيه صحن بن قويعان
يامحمد شـداد الحـب صـار متمايـل
اشتريته وبعته يـوم طاحـت عصيـه
كد رقيت الطويل وكد تبعـت المسايـل
اشتهي المشي رجلي عن ركوب المطيه
وانت والله مالوك يوم خلـت المخايـل
كنك المضمي اللـي يابسـاتٍ رويـه
شفت بيض المحاجر والرموش الظلايل
شفت ماشاف بصري يوم تيـه خويـه
مثل ماينفـع العطشـان نشـح البلايـل
انت تنفعك نغمـات الهـروج الخفيـه
كلمة الحـب طـبٍ للقلـوب الغلايـل
هـي علاجـه وطبـه مايبـا صيدليـه
لك سنيـات يمـي مابعثـت الرسايـل
قلت حج وتطـوع واثـر نيتـك نيـه
احسب اللي مضالـك مابقابـه سمايـل
واثر سرحان مايدخل بحـوش الرعيـه
ويـوم طـق الزنـاد وولعـن الفتايـل
اجزم اني معك في كل حسنـه وسيـه
كان مافيـه شـيٍ فـات مانـي بقايـل
الصداقـه قديمـه والعلاقـه قـويـه
دام مافرقونـا بيـن حمـر النثـايـل
ماتخـرب صداقتنـا السنيـن المديـه
قصيدة اخرى اسندها شاعرنا لاخيه الشاعر الكبير
صــحـــن بــــــن قــويــعــان
ياصحن ياكثر زينٍ في سميـره
جل قدرة ربي اللي صورتهـا
لاعريض ولاطويل ولاقصيـره
مع نعومة عودها زين طخمتهـا
لاتحسب حساب هذيك الكبيـره
خالف الديمه سحابه وأدهمتهـا
يوم طبت صار بالملعب حشيره
صفق الجمهور والبيض أزعلتها
خدها شمس العصير المستديره
فرعت والقذله الشقراء كستهـا
كن وسط عيونها خيـلٍ مغيـره
والسيوف الحمر بيدين اركبتهـا
يوم تبلـج بالشفاتيـن المنيـره
هن حمر واللولو الأبيض تحتها
تذبح العشاق بأحرابٍ شطيـره
بين لـدات العيـون وسلهمتهـا
غرةٍ مامثلها وسـط الجزيـره
لا كستها بالذوايـب وأظهرتهـا
برق غراً قهقرتهـا المستثيـره
يظهر الربان من حدر هدبتهـا
كنها عنـق المهـاة المستذيـره
طالعت بأدباش بدوٍ وأذعرتهـا
ذكرتني مثلهـا تلعـا غريـره
قد خذت بسرة فؤادي وانهبتهـا
لو مودتها على قلبـي خطيـره
السنين اللي تقافـت مامحتهـا
فرد أخيه صحن بن قويعان
يامحمد وش قلب وضحاء سميره
وين هاذي عند ذيك وويـن جتهـا
ليه توصفها على اسـمٍ مستعيـره
كل شجرةٍ كود تعرف بشجرتهـا
انت لماً عني اخفيـت السريـره
أو درعت بعالمٍ ماعـرف لغتهـا
نوب اخوك بكل حاجه تستشيـره
ونوب تخفيها وتظهـر مشكلتهـا
جعل ربي مايغيـر لـك بصيـره
لاتغيـر مابـقـى الا خاتمتـهـا
البنات أصنـاف واشكـال كثيـره
والقبايـل كـل نفـسٍ وشهوتهـا
وأكثر الشوفـات مافيهـا بريـره
ودي انـك ماتلولـس بشبكتـهـا
انته مانته من قوانيص الجحيـره
لاتعـلـق نفسـهـا بمواعدتـهـا
عن هواها مكتفيـنٍ فـي منيـره
لو تبي تجلب سميـره ماشرتهـا
اترك اللي وردنا خالف صديـره
رد في عقلك وشف وش مصلحتها
لحقت المقفي على المطلب عسيره
الهوى فاتـت سنينـه واثمرتهـا
سد بيبانه عسـى بالأمـر خيـره
فكنـا مـن طرقهـا ومراقبتـهـا
قد حصلي فيـه وقفـاتٍ شريـره
مانسيت جروح كبـدي وافحمتهـا
----------
قصيدة شاعرنا في رثاء المغفور له بأذن الله الملـك فـهـد بــن عـبـد العـزيـز
ياعين هل الدمـع صـافٍ غزيـرا=مـن فجعـةٍ جتنـا سمعنـا نباهـا
تكسّـر العبـرات فـوق النظيـرا=يـوم الاذاعـة بثـت اول نـداهـا
نـداٍ يخلـي فكـر الامـه يحيـرا=ويكـدر العالـم ويزعـج هـواهـا
فجيعـةٍ فيهـا يحـيـر البصـيـرا=علـى جميـع المملكـة وصدقاهـا
ساعة سمعنا العلم حـاس المريـرا=ورتجـت العالـم وبيّـح خفـاهـا
تقول شعب المملكـة فـي حشيـرا=يومٍ بـه المرضـع تضيّـع نماهـا
الشعب كله فـي صيـاح وزفيـرا=يبكي ويبكون العـرب مـن وراهـا
في ساعـةٍ فيهـا النّفـس مايسيـرا=وعيون كـل الشعـب ينهـل ماهـا
مات الذي مثـل السـراج المنيـرا=سلطان نجد اللي عمرهـا وحماهـا
ابـو اليتامـى والعمـاء والفقيـرا=وابو الشعوب اللي رفـع مستواهـا
وابو صغير السـن وابـو الكبيـرا=وابو العروبه مـن شفاهـا إللفاهـا
خلا فقير الشعـب يلبـس حريـرا=ويعيـش عيشـه فالعمـر مانساهـا
هـو الفهـد مالـه سمّـيٍ خشيـرا=زعيم كـل العـرب رأس زعماهـا
وليا جاء على الاسلام شئٍ عسيـرا=تحيـر فيـه شعوبهـا وروسـاهـا
خـلا العسيـر بقـدرة الله يسيـرا=خلّـص مشاكلهـا وطمّـن عداهـا
وايضا وراء الشعب السعودي سهيرا=لابانـت الخلّـه عليـهـم رفـاهـا
لو أمدحه كبر السمـاء المستديـرا=وكثر النجوم وكثر الارض وحصاها
ما أحصيت فيه خصاله اللي يديـرا=اللـي فعلهـا فالحيـاه وقضـاهـا
كـم دولـةٍ عمّـر بناهـا تعميـرا=عاشت إبفضله ونجحت فـي بناهـا
قبله وهي في هـول نكـر ونكيـرا=لينه عليهـا ارخـى يـده وحتماهـا
خلا دول الاسلام فـي كـل خيـرا=يصرف له اشياءٍ عند ربي جزاهـا
وكم واحـدٍ مظلـوم جالـه ثويـرا=ويديه مـن خيـرات ربـي ملاهـا
وخيله على الاصحاب ماهي تغيـرا=وإلا العـدا يلعـن لـك الله ثواهـا
حتى عـدّوه فالسمـاء لـو يطيـرا=في قـدرة الله نزّلـه مـن إعلاهـا
يخضع حدر رجله ضعيفٍ حقيـرا=يجـي مثـل صـدام فـي منتهاهـا
يومنـه أخطـأ دربـه المستنـيـرا=جمّجمّتـه بنعـول رجلـه وطاهـا
خلاه يرغـي عقـب ذاك الهديـرا=حتـى معالمـه الكبيـرة محـاهـا
خـلاه يرغـي كارغيـان البعيـرا=في غرفـةٍ فيهـا بلاهـا وجلاهـا
هذي فعول مظيـر الخصـم ظيـرا= فهد الفهود الليـث مقعـد صغاهـا
ويوم انتهت ماعـاد عنهـا مطيـرا=اقفـى عـن الدنيـا وخـلا غثاهـا
عساه فـي جـاه البشيـر النذيـرا=في جنة الفـردوس يسكـن ثراهـا
والشكـر للـرّب العزيـز القديـرا=والحمد له حيـث المصيبـه رفاهـا
قـاد السفينـه فـي محلـه خبيـرا=اللـي ليـا قـاد السفينـه قـداهـا
عبد الله اللـي مايخـون الضميـرا=تبشر بعـز المملكـة يـوم جاهـا
لعلّـهـا تنـعـم بحـكـة كثـيـرا=وسكانهـا عسـاه يكسـب رضاهـا
تصير فـي عهـده ربيـع وغديـرا=والشعـب يلقـى نعمـةٍ ماشراهـا
ولي عهده جعل ما أجلـه قصيـرا=الله يجيـره مـن مصايـب بلاهـا
القايـد الوجـه البشـوش السفيـرا=ريس ركـون المملكـة ووزراهـا
بجـاه رب البيـت مغـن الفقيـرا=وبجاه أبونـا ادم وموسـى وطاهـا
تعز الاسره مـن كبيـر وصغيـرا=والمملـكـة تعـزّهـا وتحمـاهـا
يالله يالـلـي للهبـايـب تـديــرا=يامنشئٍ مـن غـر الامـزان ماهـا
تحمى السعود من أي شـرٍ شريـرا=حيث انهم شجـرة يـذرّي ذراهـا
يعيـش حـدر ظلالهـا المستجيـرا=من صكته سمـر الليالـي نصاهـا
ال السعـود اللـي تعيـش الفقيـرا=لعـل ربـي مايـفـرّق عصـاهـا
وهـذا وصلـى الله وسلـم كثيـرا=علـى نبـيٍ كـل الامـه هـداهـا
تنبيه : الديــــوان منقــــول من منتدى الصمّـــان والكاتب ابو فــــلاح .
المشــرف العـــام
وهذي قصيدة شاعرنا بمناسبة عودة الشيخ جابر الصباح من رحلته العلاجيه فـــي اغـسـطــس 2005
فالسنه عيدين والثالث قـدوم الشيـخ جابـر=يوم عاد من المرض سالم على الديره واهلها
مرحبا عـداد مايـذّن علـى روس المنابـر=او عدد ماهلّت المزنـه مـن الماطـر هللها
فيك يانور الوطن واهل الوطن والكل خابـر=انّك العرق المغـذّي للبـلاد ومـن دهلهـا
جعل ربّن يبعـث اللـي ميّتينـن فالمقابـر=عنك يرفع صدمته وينـزّل الصحـه بدلهـا
ياحبيب الشعب كل الشعب متكـدّر وصابـر=من مرضك نفوسهم مرضا يشايلهـا زعلهـا
من ولاهم لك وحبك جعل شرّك عنك عابـر=تهتف امتّك الذي عدلك عـن الميلـه عدلهـا
لك محلّن فالقلوب من الصغار اليا الاكابـر=حيث وصّلت الوطن واهله حياتن ماوصلهـا
من يبا ينسا جميلك من جميع الشعـب ثابـر=وانت لولا الله ثم لولاك كان الشعـب اكلهـا
شلت عن شعبك احمول الظيم فأيّامن غوابـر=مايشيل الكايدات مـن الحمـول الا جملهـا
عشت ياشيخ البلاد اللي على الصكّات صابر=شايلن هم الجميـع وكـل صكّـه محتملهـا
يوم جتنا قـوّة اللـي معتـدي دقّ الاشابـر=واقفن في وجهها كالليـث ليـن الله خذلهـا
بالسياسه والصبر شلته مع المطـلاع دابـر=ثم رحل من فضل رب البيت ماكنـه نزلهـا
كن جيشـه ماتمركـز بالمهاجـع والعنابـر=قوّتن مثل الجـراد المنتشـر ربـي فشلهـا
التقت في جيش داس خشومها هي والصوابر=ضربتن يصبح بها الشايب ولد ظافن سبلهـا
يوم صار القصف والماص الحمر جاله تنابر=اعذر الطمّاع وايدينه عن الطمعـه غسلهـا
ثم غدا كبر الذبابـه عقـب تفتيـل العظابـر=قادها الله قود لين انه رمابـه فـي وحلهـا
في قيادتك الحكيمه عنـه سدّيـت المعابـر=مالقا دربن يعبره مع سهلهـا ومـع جبلهـا
عشت ياامير البلاد اللي بك الشعب امتجابر=راضي (ن) في دبرتك وعيون حسّاده كحلها
جعل نفسن ماتحبك مالهـا فـالارض قابـر=وان حصل يوم الحساب الله لايحسن عملهـا
قلتها من قلب مخلص ماقصد نتف الاوابـر=والسلام ختام وايـام الفنـا يـدرج عجلهـا
-------------------------------------------------
منقــــول من منتدى الصمّـــان والكاتب ابو فــــلاح .
.... مواضيع مشابهة أو ذات علاقة بالموضوع :
بالله ياهـل البيـت لاتشلعـونـه=خلوا عيوني من حبيبـي تـروى
ثـم لاتهوزونـه تبـا تضربونـه=جعل اليدين اللـي تطقـه تكـوى
جلده حريـرٍ لـو تبـا تلمسونـه=مثل النفل لو تلمسـه لمـس ذوى
غروٍ نياشين الغـلا فـي عيونـه=يضحك ويشرلي على القلب جوى
يقـول هـذا لـك ولايقربـونـه=وابو الذي يزعل بعشرين ضـوى
وانا مليك ارضاه ماجـوز دونـه=قلبي معه في يديه من حيث موى
حيث اني افهم ماخفى من ضنونه=وادري بقلبه مـن قديـم وتـوى
واخشى عليه من العرب ينضلونه=انا اشهد ان اللي مسويـه سـوى
نبنوب مـوزٍ مايـلات غصونـه=عرقه من الجم الـزلال يتقـوى
والخد بـراقٍ تكاشـف مزونـه=مثل المشاعل في مقاديـم نـوى
عنق الغـزال مخلعـاتٍ متونـه=والثوب من فوقه عليـه يتطـوى
في خاطري مافالبشر مثل لونـه=مما خلق ربي مـن ادم وحـوى
الله على من شد مجمـع قرونـه=واكنع عليه وفـي رقبتـه تلـوى
وهذي قصيده آخرى لشاعرنا يامرحبا ياللي لك القلب مفجوج
يامرحبا يااللي لـك القلـب مفجـوج =عـداد نسنـاس الهبايـب ليـا فــاج
حطيت ريع بوسـط القلـب هجهـوج=ياعيـن حـر بالخضيـرا لـيـا راج
حبك طفح بي طفحت السـاج بالمـوج=ماعاد لي عن حبـك اليـوم مخـراج
اودعتنـي لاشـرب ولاكـل ولادوج=ولاستطعم المنطوق مـن كـل هـراج
لاغبـت عنـي دق بـي كـل دالـوج=قامـت تواردنـي هواجيسـي ازراج
قلبي يجينـي نـوج واضيعـه نـوج=يجيه مـن فرقـاك سجـه وسوهـاج
كن البنات الشقر عنـدي مـن الهـوج=ماكن به غيـرك علـى الارض دواج
عندي جميع السن بنات العرب عـوج=الا لسانـك فيـه لـي طـب وعـلاج
في هرجتك شئ من السحر ممجـوج=والنور مـن غرتـك يطلـع وينبـاج
وليـا ضحكـت بذبـل مابهـا فلـوج=مثل البرد مـن مزنـة تلعـج العـاج
واغضيت في سودن بها السحر مدعوج=ترسل سهوم الموت من حجره افـواج
تنثـرن شقـر مثـل كاسـي الغـوج=تاصل اليا ردف كمـا حـزف ديبـاج
جاني بـلا فالقلـب يسوجنـي سـوج=يتلنـي يمـك لـك الـروح تنـعـاج
كني اليا شفتك علـى انهـار وبـروج=والاملك شعبٍ علـى راسـي التـاج
واليا بديت بضحك وهـروج واغنـوج=قلبي غدا زبده على صالـي الصـاج
او مير كني بين الاضـلاع مخجـوج=بشلفا مثـل شلفـا غنيـم بـن فـراج
غنيم بن شبـلان مخلـن لـه سـروج=ليا صاح في تالي الرمك راحت امراج
تبـا تخلينـي مـن العقـل ممـروج=على العمـر شامـان تدرجنـي ادراج
ياروح روحي كـان مامنـك منتـوج=خف الغلا لاعـاد تحرجنـي احـراج
خليتني يازيـن الاوصـاف محـروج=صليـت فيّـه شـرق ماعـاد يحتـاج
لـو قلـت سيـر وخـذ عندنـا روج=جيتك على الاقـدام ممشـى ودفـلاج
اجـي وانـا مبهـوج واروح مبهـوج=ليا حصل لي منك لـو رفـة احجـاج
سبحان من سوى الاوادم من الحور
سبحان من سوى الاوادم من الحـور=انا اشهد ان الله هـو اللـي يسـوي
زولٍ خلق من نـور وبخدتـه نـور=نورٍ من الخالق ماهو نـور ضـوي
ادعج غنج خده بـه الملـح منثـور=تقـول بـدرٍ بـان بفتـوق نــوي
وعيون تذبح بالهـوى كـل منعـور=سودٍ مضاليلٍ علـى القلـب سـوي
نيشانهـن رمانـة القلـب ياسـرور=وحرابهـن مـن دم جوفـي تـروي
هو مسرفٍ فيه وانـا فيـه مجبـور=حبه ملـى قلبـي وجوفـي وجـوي
من زود حبه كن كـل البنـي عـور=لاغاب عنـي قمـت ادوج واهـوي
ابوجديل اشقر علـى المتـن منثـور=واهنـي مـن بيديـه فيـه متلـوي
ان كان شـدو يـم وسميـة الثـور=واحسرتـي لاقالـوا البيـت طـوي
وان مت من مركوز الانهاد معـذور=اللـي عليـه هالـزمـان متـكـوي
ولو هو عطاني صاحبي كبر الاظفور=قلت الدواء منك وعلـى الله بـروي
الله من قلبٍ عوى عوية الذيب
الله من قلبٍ عوى عوية الذيب=ذيب عوى لجت ضلوعه ولجي
عليك ياراعي العيون المهاديب=سودٍ مضاليلٍ وساع ٍ وبجي
سودٍ تشذب بسرة القلب تشذيب=طحت بخطرهن يالله انك تنجي
سهومهن تسطي على القلب وتصيب=تخج صندوق المعاليق خجي
ياصاحبي حبك لقلبي عواقيب=ارفق علي شوي قبل استلجي
يا اللي عليك عيون الامه مراقيب=تقول بين شفاك درٍ يمجي
والخد براق المزون المهاضيب=اللي رعوده رجت القاع رجي
يامنوتي مافيه شك ولاريب=منساك كود انسى صيامي وحجي
يابو نهودٍ شلعن مقدم الجيب=كمشمشٍ عرقه من الماء ينجي
من فوقهن شقرٍ تغذى على الطيب=ريح الشمطري في طرفهن يعجي
ذيل اشقرٍ ينسف خلاف العراقيب=تطلب عياله بالمهر والترجي
هزه وزرفات السبايا جناديب=لوما شليل السبر والمال هجي
ذبحتني ياسيد كل الرعابيب=فجيت قلبي يأريش العين فجي
فجن مثل مظراب شلفاء تراحيب=شلفاءاً تخل الدم الاحمر يكجي
لا وردة من كف مرو المغاليب=والخيل كاسيها ضبابٍ وعجي
ياعاذل المشتاق مابالهوى عيب=ماذقت لذاته عسى امك تدجي
لو ذقت من حلوه ومره تجاريب=مالمت طراد البني الغنجي
نجل العيون مزعلات الخطاطيب=شعوٍ عذاب مقطعين الفرجي
لو يحصل ليديك فيهن مقاضيب=مالمتني في حبهن والتهجي
يم الحبيب اللي هروجه تعاجيب=ياعين لديله ويارجل سجي
ياناس خلوني تراني تفجرت
يانـاس خلونـي ترانـي تفجـرت=ماطيعكم مير اقصروا الحكي عنـي
ياعاذلي كثـرت حكيـك وكـررت=نصـايـحٍ لاشــك مايقبـلـنـي
مهما حكيت وقلت واعلنت واسررت=اذانــي الثنتـيـن مايسمـعـنـي
انا بسكراتي من الحـب مافكـرت=وانته تبـي تشـره علـي تعذلنـي
لو يتهيا لي بوسط الفضـا طـرت=سويـت لـي جنحـانٍ يساعـدنـي
واليا بغيت اصل هوى البال سيرت=مـراكـز التفتـيـش مايمنعـنـي
اجيه لو اني على عمري اخطـرت=وربي اليـا منـه رحمنـي ظمنـي
ياصاحبي من زود حبك تدهـورت=منك الهمـوم الجايـرات اضهدنـي
نقلت حملٍ لو يحمل علـى الفـرت=شفته على الواحـد بحملـه يحنـي
عزرتبي يازين الاوصاف عـزرت=وانا بن عـمٍ لـك ومسلـم وسنـي
يحقلك ذبحـي لـو انـي تغيـرت=واليوم ذبحي وش تبـي فيـه منـي
اعطف علي شوي فـي ماتخيـرت=شـيٍ يخلـي خاطـري يرجهنـي
لو هو بشوفك بس منـاك لاسـرت=والا العلـوم الباقـيـة يقمحـنـي
يامورد الخدين من عمري اعـذرت=واسبابهـا سـودك اليـا سلهمنـي
هاك العيون اللي اليا شفتهن حـرت=تقـول فيهـن كهـربٍ يجذبـنـي
اليـا شفتهـن هللـت لله وكبـرت=اللـي مسويهـن وفيهـن فتـنـي
راكب اللي تقول مذّير ذاعرينه
راكب اللي تقـول مذيّـر ذاعرينـه=سامعٍ صقعة البندق وهـو مارمقهـا
يوم فـز وتشمحـط للمبنـدق بعينـه= حاذفٍ صفرة البندق وهـو مافهقهـا
وانصفق مقفي تاصـل لحيّـه يدينـه=لو يباري القطاه اللي تقلـب سبقهـا
اشقرٍ من نسـل شقـران متخيرينـه=من حرارٍ يعرفون الرجـال معمقهـا
اوصله شاعرٍ كل العـرب خابرينـه=كم بيوتٍ مثل نظم الجواهـر طرقهـا
هو حميد الرشيـدي كلكـم عارفينـه=المعاني مع اهل العرف يفتـح نفقهـا
سلـم الله رجـاه وسلـم الله يميـنـه=حيثه الكلمة العوجاء ماعمره نطقهـا
باغ ٍ اخبره فـي علـم بينـي وبينـه=الامانه غدت وامينهـا اللـي سرقهـا
لو حلف لي بوجدانه وربـه ودينـه=ما أقبل العذر لو انه بغيـره لصقهـا
وانت تدري لاشك الحق وينه ضمينه=وين حلال مشكلهـا ومـدّي رفقهـا
ياحميد الطرب والانس راحت سنينـه=مع سنين ام خمس اللي تشاعل فشقها
في يدين الـذي مضرابهـا حافظينـه=عند تال الركاب اليا تناضـح عرقهـا
في نهارٍ يفـر المـرء مـن والدينـه=تذهل المرضعه عن حملها من رهقها
يظهر الحق هاك الوقـت لمدورينـه=كانها طارت الابصار ممـا طرقهـا
واكرم الناس بالذمـه يهّمـل جنينـه= لو يبا كبـر حبـة خردلـه مانشقهـا
يالله العـن ابليـس وعالـمٍ تابعينـه=عالمٍ ماتراقـب ربهـا اللـي خلقهـا
الزمان اختلف والخلف من وارثينـه=والضمير انعدم والناس اخذها وذقهـا
لو تطالب بحـقٍ والعـرب شايفينـه=قيل لك فاتت الدعوى وشربت مرقها
واصبح الحق في وسط البحر حاذفينه=وان تكلمت يالرجال طالـت شققهـا
وانفتح باب حسادك على مصرعينـه=واركبت حصنها العالم وهدت سلقهـا
يامكافي تكافي شـر الارض ودفينـه=وإبعض الناس ليت الله سحقها ومحقها
كود من فيه خيرٍ جعل ربـي يعينـه=والبشر خلق ربي مير ربـي فرقهـا
فيه من ينفـع العالـم وينـدا جبينـه=وإبعض الناس ماودك تعرض شبقهـا
مير با قول بأعلى القيـل ياسامعينـه=واطلب اللي خلق سبع البحور وفلقها
جعل ربي يعز الدار مـع حاكمينـه=ديرةٍ كل من جاها شبع فـي شنقهـا
من فضل قايد الدولـة ومـا سابقينـه=شبعت الناس وارتاحت وربي رزقها
والحسد والنكد يرجع علـى فاعلينـه=والقلوب الغشيشه جعل يابس ورقهـا
---------------------------------------------
لولاك يالزين الصغير الفروعي
لولاك يالزين الصغير الفروعي=ماجيت من نجعي لهلك متعني
ياصغير الانهاد طيرت شوعي=دايم ورجلي يمكم ماتوني
عليك لونه من امك بشوعي=كن العرب تتنهبك وتغبني
في هرجتك لو هي قليله قنوعي=لو كان هرجك يسلب العقل مني
يوحيك قلبي قبل توحي سموعي=حتى العروق الجاريه يشهدني
حبك تخلخل مع مفالج ضلوعي=حتى بنوم الليل ماغبت عني
وان غبت عني يامليح الطبوعي=قامن دواليب الغرام يحدني
فقعت ثم قامت تسابق دموعي=مثل الخرز من رمشهن يمطرني
واقنب كما ذيب عوى عقب جوعي=واليا عوى معه الضلوع يعوني
لاقام يقنب في طويل الفروعي=ماشاف مخلوقٍ ولاشاف جني
ارض خلا مابه من الناس دوعي=بس الفجوج الخاليات يهوني
الذيب يقنب ماحصل له متوعي=وانا بلاي اللي بحبه شحني
راعي جديل فوق ردفه اشروعي=ذيل اشقرٍ شاف السبايا تعني
لاشافني زعلان ماعاد يوعي=ذولي مقابيلٍ وذولي يجني
يقول انا لك شايمٍ عن ربوعي=واقول مافاد الحكي والتمني
ما أنت متهيٍ لي لو احب كوعي=دونك حجاجير تحن وتوني
الا يجيبك من يجيب الرجوعي=مخلي الفياض الممحله يخضرني
او يأمر الله من يقود الجموعي=عبد العزيز الفيصلي يمتكني
وهذي قصيده آخرى لشاعرنا " صاحبي ناشني بالمودة نوش "
صاحبي ناشني بالموده نوش=نوش مسقًا تساعر بوسط الجاش
تلني تلت الركب للقنطوش=يوم قفوبهن شافهم حشاش
عوص هجنن عليهن مصطر غوش=وجههم كاسبًا والقفا منحاش
لاعني بالهوى لوع فرخ وحوش=واودع الكبد من سبته حمّاش
زين فوق المبيسم ثلاث رقوش=فوق خدًا يشادي شقاح الشاش
ان نطحه الهوى ضامره منجوش=وان قفاه الهوى شايفه ماعاش
وان ضحك بالرهايف يابو علوش=مت واعمري اللي خذاه بلاش
يوم احلي جديله شليل كروش=شافت السبر يومي على الادباش
ذيل شقرًا تكزه بوجه الهوش=كل ماامهلها بالرسن تهتاش
آه يامشخص الصايغ المنقوش=فاصلاً في حماره بياض قماش
مشخصًا صافيًا ماعليه عبوش =كامل الوصف مافيه قولت ماش
مرت عليّه يوم عيد رمضاني
مرت عليَه يوم عيد رمضاني=نبنوبتن مثل الجنيه ادهشتني
قالت صباح الخير يامودماني=قلت الحياه ابغرتن صبحتني
اول سلام معاقبن باليماني=بصابعن مثل الذهب خامستني
قامت تبسملي بغر الثماني=حتى على الموت الحمر وردتني
تضحك بغرٍ كنها القحوياني=بشفيها ذوب العسل لو عطتني
في خدها الموت الحمر له غواني=بعيونها اللي ساحره كهربتني
اموت واحيا بين عشر الثواني=لارقرقة بعيونها واخزرتني
خزرة غلا في ضحكتن بغنجاني=منها حياةٍ لي وفيها اجرحتني
تظهر لي رموزن تحشر احشراني=فيهن نياشين المحبه دعتني
لا شفتها قلبي يروج اروجاني=وين اعرضت ليه وين انطحتني
لولاه تردعها الضلوع المحاني=كان الحياه مع العرب فارقتني
وهذي قصيده آخرى لشاعرناالحب بلوى واكثر الناس بلوى
الحب بلوى وأكثر النـاس بلـوى=وأنا دليلي يأهـل العـرف عينـي
القلب ماله في سميـره وسلـوى=لو أكثـر العالـم لهـن ميدينـي
مالي بعض الصيد عسـاه يلـوى=ما ينشرح له خاطري لو يجينـي
القلب شفه فـي عماهيـج علـوى=نجل العيـون مهلكـات الجنينـي
اللي مجاذبهن من طيـور شلـوى=مرويـن حـد مذلقـات العرينـي
لا جا الدلع يا بوش والحكي حلوى=لو كان قلبك مـن صفـاةٍ يلينـي
ملزوم قلبك يجزل اجزال دلـوى=لا جتك تمشـي تنعـط عطفتينـي
والرأس ذيل كروش ما جت بفلوى=شقـراً تكـم معيـلات القطينـي
لو قابلت لك في هـدوم سملـوى=تغنيـك عـن نزالـة المشرقينـي
هلا هلا يأم العيون المظله
هلا ... هلا يأم العيون المظلـه=اللـي بعينـي مالهـن حـلايـا
فيهن تقول طـراد خيـلٍ وسلـه=اما هـل الـردات والا الطنايـا
لا احذفو عـن المهـار الأجلـه=وردوا لبيـضٍ كنهـن الحنـايـا
ورداتهم تشفي القلـوب المغلـه=من غير حقرانٍ لباقـي النحايـا
يا بنت من ينطح وجيـه المهلـه=زيزوم عيـراتٍ ومقـدم سبايـا
مع دربه العيرات مثـل الأهلـه=دايـم سماريهـن تتالـى حفايـا
العذر منك اني فلا قلـت زلـه=لا طاب حظ مصورين الحكايـا
ما فيك ما ينقال فـي كـل ملـه=وعذروب أهلك يعدلون السرايـا
والزين فيك أحلا الوصايف مدله=مالك بغضـات الصبايـا تهايـا
شمسٍ على روس النوازي مطله=شعاعها يرسـل سهـوم المنايـا
لا بانت الغـره عليهـا اسـم الله=بأطرافها تقـل يتكاشـف مرايـا
مثـل البـروق بمزنـةٍ مستهلـه=توضي وكاسيها أشقرٍ له زوايـا
ما شفتهـا الا ساعـة مستزلـه=يوم العياد ويوم ذبـح الضحايـا
فالماقع اللي شافها النجـع كلـه=تلعب نهار العيـد بيـن الصبايـا
بحجاجها سيفٍ من الهنـد سلـه=تشرق وترهق موسعين الهوايـا
فأن كان هذا سب أنا راعي لـه=يا سيـد كـل مفلجـات الثنايـا
وانا ما أسب الناس طبعي جبلـه=لو كان أشوف الناس تمشي عرايا
إلا ليا جـاء شاعـرٍ فيـه خلـه=مضيـعٍ دربـه وعنـده نـوايـا
اعطيه علـمٍ ليـن دربـه يدلـه=واسنعه بالـي يسـوق المطايـا
هذه قصيده لشاعرنا وهي تعبّر عن نفسها
الشيخ لاقام يتهرّب عن الناس=تراه مع ورك المطيّه تدلى
لوهو ولد شوخن بعيدين الارماس=اليا استهان بحق الاجواد ولى
لاجنّب الواجب ودلبح مع الساس=وانحاز مع بعض الوجيه يتسلى
مثل الجمل ماعنده شعور واحساس=اليا ملا بطنه تياسر وفلّى
واللي يبيله سمعتن ترفع الراس=يرقابها روس العلا ويتعلى
ياخذ مثل سلمان بالطيب مرواس= مشرّع البيبان في كل حلاّ
لاجيت بيته شفت من كل الاجناس=تشرب وتاكل والمخابي تملاّ
ينسف على العالم ملايين الاكياس =واللي مكذّبني يجي ويتحلى
ذولا مصاديرن وذولاك جلاّس=مثل الورود اللي تعطن وتعلى
هذا الذي بالطيب ماهوب ينقاس=اللي على طول الدهر مايملا
شيخن نظيف العرض من كل الادناس= مزبّن المظيوم ريف المقلاّ
زودن عليه بقوة الراس والباس=عوق العديم اليا غلظ واستجلا
الله يجيره من صواديف واتعاس= حيثه علينا مثل قيفن مظلا
والا خطاة الشيخ جعله للافلاس = بخيل ورزيل وجامعن شين دلاّ
اليا ذلف ذلفة دهام بن دوّاس= اللي عن الديره واهلها تجلاّ
يقولون قلبك دايماً للقنص يتوق
يقولـون قلبـك دايمـاً للقنـص يتـوق
وانا اقول هذي رغبـةٍ لـي وعاشقهـا
انا ليّ رغبـه والصقاقيـر فـن وذوق
يعرف الصقار مـن عشقهـا وتشبّقهـا
وانا رغبتي وهوايتي شي يـا مخلـوق
هوى البر في غرب الديار ومشارقهـا
ليا جيت روضٍ فيه مختلـفٍ الزملـوق
نبانيـب نبتـه ناعـم الريـح يطرقهـا
مساقيه نوٍ ممطـرٍ بـه رعـد وبـروق
تهشـم مزونـه فالوطـا ليـن يغرقهـا
عقب سيلة العشب يتعـلاّ نباتـه فـوق
تشوف الفياض من النبـات وتضاوقهـا
تشوف الزبيدي كنه المـرو فالرقـروق
والأشجار ظاهرٍ الزهـر مـع مفاتقهـا
ليا دجت فيه عصير والاضحي شـروق
يونّسك شـوف البـرق فيـه وتخافقهـا
وانا في يـدي شيهانـة جنسهـا يلـوق
لو الخارم المقفي على الخفـو تلحقهـا
ليا ظفت الجنحان كن السمـا مشقـوق
سوات السهم والعين مـا عـاد ترمقهـا
عليها اطيارن يبهر الحاكـي الصـدوق
وفعـلٍ يحبـب فالشياهيـن وطرقـهـا
ليا شقّت الداغر على القلب والمعلـوق
تعجّـب ولله العجـب يـوم تشلقـهـا
اناستك ياراع الولع جعل مالـك عـوق
لعـل السلامـة فـي حياتـك ترافقهـا
أخذ فالقنص ياللي تحب القنص غدروق
ترى ونستك في آخـر حياتـك تشفّقهـا
يقوله لك اللي ما يبا شربـة المطـروق
عسى الله يوسعهـا لنـا مـا يضيقهـا
لياجيت قاعٍ عشبه طبوق فـوق طبـوق
تساقيه سحـبٍ كـن الأنهـار مدافقهـا
ما والله اغبط اللي يحبون ظول السـوق
ولا أحب ادوّج فـي الديـار وحدايقهـا
احب المطر والخيل واحب شوف النوق
واحب الهنوف اللي تكاشـف عواتقهـا
ليا صار مـع جمالهـا عقلهـا ماثـوق
ليـا شفتهـا تقـول سبحـان خالقـهـا
عيون المهـاه وعاتـقٍ مـارقٍ منتـوق
وخدٍ كما شمس الضحي فـي تشاعقهـا
تبسّم ابيـض ذبّـلٍ مـا بهـن فـروق
كما الحص مـن محـارةٍ يـوم تفلقهـا
ليا شفتها قام يحدانـي عليهـا الشـوق
ولوهو بكيفـي كـان والله مـا فارقهـا
لجّود معضّ الذيب حاضر ما هو مفهوق
واشم الخدود اللي كما الورد وانشقهـا
هذي رغبتي وهوايتي والاّ العمر ملحوق
ولي رغبةٍ في الحر الأشقـر محققهـا
واحب اللذي به لون من ريشة الغرنوق
به الميزة اللي راعي الصنـف يعشقهـا
اليا صار فوق الوكر ماكن فيه سبـوق
سراويلـه تغطـي كفـوفـه ذلايقـهـا
عذاب الطيار الخارم المقفـي السبـوق
ليـا شافهـا مافادهـا طـول سبّقـهـا
اليا من لحقها فالهوى ساق روحه سوق
كما سوق ميراجٍ عطى النـار سايقهـا
ضربها بمخلابٍ يخـلاّ العظـام فتـوق
فراها ومـن حرصـه تنكّـس وعلّقهـا
وعطيته من الداغر نسـورٍ يذوقـه ذوق
علشان يرمـز لختهـا حيـن يرمقهـا
ليا صادها اللي لاطرد مرهـيٍ بلحـوق
بقـاعٍ خضـاره كـل عيـنٍ يشوقهـا
هزعت وشعمت النار فالحاجر المرموق
وخوياي ربـعٍ تعجبـك فـي طرايقهـا
نشاماً توسّع خاطر الضايـق المغلـوق
على المرجله والطيب عجـلٍ تسابقهـا
يجي شغلهم لاهـو بنـيٍ ولامحـروق
تسوّيـه أيـادٍ جعـل الالـه يرزقـهـا
قصيدة اسندها الشاعر : نغيمش الزويكي لشاعرنا
يامحمـد خلـف يالخـس يالاستشـاري
ياطبيب الهوى البستان وانـت الخبيـري
اسند العلم لمن يسند خصيمـه اجبـاري
والله انـك استـاذ الشعـر والاميـري
عطني العلـم يامحمـد ووقـع قـراري
انت ونعمسـت الاريـا عليـه شويـري
عطني الكلمـه اللـي ماعليهـا غبـاري
كلمـةٍ نعتمدهـا منـك تبـرد ضميـري
من عرفتك تعطينـا القـرار الـوزاري
انت اخوي الكبيـر وتعتبرنـي وزيـري
انت شاعرمطير وكل مـن كـان داري
مير بعض العـرب تذيـك تاتستشـري
وان تحرك جناح الحر صـارم حبـاري
ليا كفخ في جناحـه خولبـت ماتطيـري
والمقاسيـم يالبسـتـان رد اعتـبـاري
والتجارب تبيـن لـك قليـل وكثيـري
والمقاديـر مقسومـه مهـي باختيـاري
مايقدر على المخلـوق بامـر القديـري
والمغازي بها مهـزوم والا انتصـاري
ودونها الدرب يامحمد غرار وعسيـري
وانت لك وقفةٍ يابـو خلـف واقتـداري
والنشامـا تخـلا للنـهـار الكبـيـري
وانت لك عند كل مطيـر قـدر وقـاري
دايـم الكايـده يالخـس فيهـا قديـري
لاتخلـي رفيقـك ماتفـيـد الـعـذاري
انت من روس علوى ملحقين الكسيـري
من زحازيـح ربعـن يامحمـد خيـاري
يذبحون السميـن ويحتمـون القصيـري
يامحمد على الاجواد تجـري الجـواري
ولاتنجت في غيـرك ولالـي سفيـري
يامحمـد بـلا قلبـي علـومٍ كـبـاري
حرقت في ضميري وانت عون وبصيري
ودي اشرح لك القصه بكل اختصـاري
واتسمع مـردٍ منـك جـزل وجديـري
من غلا عيطموسن طال معها انتظـاري
فوق عشر سنوات وش عليـه تشيـري
شاحنـي وابتلانـي بالمحبـه اجبـاري
اجبر القلب في حبـه وغيـر مسيـري
شاحني شوحة الورعان لعظيـم سـاري
قام يلعب بقلبـي لعـب ورعٍ غريـري
لاتحليت عيوني فيـه قصـف العمـاري
منين ماجيه واحوفـه جمالـه غزيـري
اليا تمعنت يدخل فـي سمـاره شقـاري
ياهل المعرفه فيـه الموصـف يحيـري
لونه اشقر وفيه شوي مثـل السمـاري
ياكبر حـظ حواشـه وحظـه كبيـري
ياجمال عليهـا مـا يوصـف وصـاري
مايخليـه مـن شافـه ولوهـو فقيـري
واهني من قطف منهـا جديـد الثمـاري
ياعيون الوحش والا الغزال الصغيـري
زين ذاك المبيسـم والثمـان الصغـاري
فيه من وصف قيس ومايقول السديـري
ياصغيرٍ ملـك قلبـي وغيـر مسـاري
ناعم بالحضاره حيل واصلـه مطيـري
لو يشوفه عميد الدين صـار انتحـاري
شبت النار في جوفه سـوات السعيـري
صاب قلبه صوابٍ بين الاضلاع فـاري
يودع اللي يصيبـه حولهـم يستديـري
اه يامن خذت عقلـي وقلبـي جهـاري
الضحى بالنهـار ولال حبـه خشيـري
لاضحك شفت فيه من المحبـه مـواري
وان تكلـم بنغماتـه خلطهـن عبـيـري
كـل ماشافنـي عينـه تهـل العبـاري
فوق خدن غشاه الملـح ولونـه نويـري
ومثل ريح النفل لانـج حـول الخبـاري
بـول النبـت واللقـاط يلقـى هبيـري
او كما ريـح عشـبٍ نابتـن بالمـذاري
بان عقب الطلوله صبـح والا عصيـري
لو تشوفه قضاة العلـم حـط استشـاري
ولو تجي قاضي التميز عقلـه يطيـري
يختلـف مايميـز فيـه تسعيـن طـاري
مايميز قضايا الناس لـو هـو شطيـري
وانتهت عد ماهبـت هبـوب الـذواري
بالصـلاه وسـلامٍ للبشيـر النـذيـري
رد شاعرنا على الشاعر : نغيمش الزويكي
يانغيمش يابن تركي كفيـت الخطـاري
يالزويكي عسى شرك ماهو مستطيـري
يابن تركي عن اللي فيك مانـي بـداري
جعل رب السما لك يالسنافـي يجيـري
احسبك قبل تقرا فـي كتـاب البخـاري
واثر عينك على الغالي تهـل العبيـري
عذبنـك بنـات مطقعـيـن الـبـراري
مثل ماعذبـن قلبـي وحاسـن مريـري
خلن القلب له بين الضلـوع افتـراري
مثل ماصاب قلبـك والمقـدر يصيـري
وكم شجاعٍ يحل المشكـلات العسـاري
ان خطرته سنافي وان حربته ضريـري
لو هو يعدل الفرسـان فـوق المهـاري
لاعطنـه محبـه فـر قلبـه فـريـري
وانت مثله تراقـب للنجـوم السـواري
بين حبل الرجا والياس قلبـك حسيـري
سون البيض فيـك الغاويـات النكـاري
خدرنك من الحكـي الرقـاق تخديـري
لك سنين طويله وانت مانتـه بصـاري
مونسٍ لك غلا ماهـو بحـب الدشيـري
تقتلب وانـت لابايـع ولاانتـه بشـاري
والسبب ماحصل تقرب حوالا السريري
يمكن اللي حـداك انـه كبيـر نيـاري
او عجوزٍ ليا شافتـك تزحـر زحيـري
مانت الاول ولاالتالي تصيـر انحـداري
قبلك اللـي يـردون الكمـي للمغيـري
متعبين الركـاب مقولمـات السمـاري
يم بوش الحفيف اللي مغـب وصديـري
جنهم وارثعن فيهـم بصبـح وغـداري
ناهبات القلـوب مدوجـرات النشيـري
لين خلن بعضهـم فالنـدم والحسـاري
في نهاره يلـوب وكـل ليلـه سهيـري
غير هـذا حـذاري لاترافـق حـذاري
الـذي فيـه شبهـه لاتحطـه عشيـري
كان حبك فهو حبـه سـداري مـداري
لو يبا يقدرك هلفـاك فـي كـل بيـري
رافق النشمي اللي مثل طيـر الغبـاري
يذبـح الدارجـه والطايـره ماتسيـري
وكانك اعلنت يانغيمش ببعض الطـواري
ماتوقـف ولاخليـك هـذاك غـيـري
مايخلـي رفيقـه تفترسـه الضـواري
كود خطوا الحمار اللي يعـط النثيـري
اجزم اني معك لو هو بضرب الشباري
والعدو ياولد تركـي ضعيـفٍ حقيـري
واكتم السر بعض الناس مالـه ريـاري
ماسمع منك قالـه جعلـه الله غضيـري
لاتخلي عدوك منـك يضحـك شغـاري
الزم الصمت لين انـه يقـر القريـري
وبعض الخيل يقصر عن قودها المباري
ماتهيـا لشـوخ وحـظ رجـل فغيـري
ماتهيت لخو جوزاء وبرغش وضـاري
ولاقضب حبلها ابن سويط شيخ الضفيري
والعرب خلوا النعرات هي والحمـاري
واكثر الناس رد السيف وسط الجفيـري
وام خمس تركوها الاولـه والسـواري
وام ركبه ودهـم يزعجنـي الذخيـري
قبـل مافيـه لاندكـروز والا سفـاري
فيه شلفـا علـى قبـن لهنـه عريـري
يوم توحي بطـراف السبايـا الثمـاري
فـي نـهـارٍ عـبـوسٍ قمطـريـري
وبعض البيض في مركاض ابوها تماري
يطلق الوجه عنـد معطفـات الدريـري
والضعون يحماها من جميع الخطـاري
والسبايـا ليـا جاهـا تقافـا صريـري
وعقبها رغبتـي وهوايتـي وافتكـاري
يصبح الجو هـادي مايطيـر الذريـري
والشعر مثل نهرٍ دايـم الـدوم جـاري
ماتعبـره سبابيـح مـداهـا قصـيـري
احـدن يقطـع الانهـر بليـا كـبـاري
واحد كل شعره مثـل حيـري وديـري
كل من يسمعه عليه عليـه ناقـد وزاري
مير من يقنعه حيث انه اعمى بصيـري
يبلش الناس في كثر الحكـا والهـذاري
ادمي مير قلبـه مثـل قلـب البعيـري
ان نصحته بلشت وهو من العقل عـاري
وان تكلم ليـا بيـن الرغـا والهديـري
والمثل قال بعض الناس خيبـة دبـاري
لايضرك ولاينفعـك عظمـه هشيـري
وعادتي من قبل ماحب كشف المعـاري
من عرفت الحيا والشعر هـذا مسيـري
وكلمةٍ تزعل الاصحاب يابـو مشـاري
مانبيهـا ولافيهـا مــن الله خـيـري
والسنافي على راسي ماأحطـه يسـاري
وان تغير مسيره قلت يارجـل سيـري
قصيدة الشاعر المرحوم : مفرح الظمني التي اسندها
علـى عـدة شعـراء ومـن ضمنهـم شاعـرنـا
الله من قلبً همومه وطنه
كنه يسمر في ضلوعه مسامير
ياطارقاً نجر الهوى لا تدنه
جورك عليه يكسر القلب تكسير
واعزتي لسعود من كبر سنه
عنه انتحى عصر الصبا والغنادير
في مامضى غيد الصبايا يبنه
واليوم ماله من وراهن مشاوير
حتى ابن هادي بالعيون احربنه
تغيرت لفتاتهن والمضاهير
ماكنهن عقب الغلا يعرفنه
راحن على ريف النشاما مناكير
والخس في قلبه من الحب لنه
مركز دفاعه بين هدمن وتعمير
والى نشدته قال قلبي خذنه
يامن ذكر لي وردهن والمصادير
وصحن الى شفته مع الناس كنه
بين الرجا والياس يرسل مداوير
يطحن غرامه والهموم طحننه
يشكي على دبيان بعض التدابير
اقفى جديد العمر مافيه منه
اقفاي عشب جاه صيف ومعاصير
كنت مزونه والسمايم شونه
وابعد ثراه ويبسن النواوير
ليت الليالي ماخذن رجعنه
ينشاف زمل مدوجرات البواصير
يوم الحطب بحبالهن يجمعنه
بين الفياض وسانحات الدواوير
راع الهوى لو مايجيهن يجنه
والشك زايل والطوارف مسايير
والى لفاهم طارشاً ينشدنه
عينت ماعينت من غير تقصير
والى تلافن من ربيعاً قضنه
تقابلن مقطانهن بالتباشير
والعصر غالي لبسهن ينشرنه
بين البيوت وبين ورادت البير
يازين صب الدلو بقدورهنه
قدام ترو مرزمات المعاشير
مافيه رادو بالغنا يسمعنه
وإلا جهازً يختلف بالتصاوير
بس المدوه يوم للبوش حنا
وقولت ياراع السانيه بالمحادير
راع المحبه بالنظر يشغلنه
تنشق دلوه بين روس المناعير
كم عاشقً بخدودهن صوبنه
ومعكرشاً فوق الردايف دعاثير
على العبس ومن الشمطري غذنه
ماقصصوهن عاملين الكوافبر
واليوم وقتاً يوذي الناس فنه
عشق الهواتف والصور والمزامير
وسعود صاح وتالي الصوت ونه
ومحمد اخفى صيحته بالمعاذير
أبو خلف عجف السنين محلنه
يومين وألا يذكر البيض بالخير
طشوا كلايف جيشهم والأعنه
ماعاد قالو درجوهن مغاوير
يارب بدل نار الايام جنه
واغفر ذنوب اهل الوجيه المسافير
رد شاعرنا على الشاعر : مفرح الضمني
ياللي تدن النجر دنه ورنه
خله يجضور من غرامه تجضوير
حنا هله كان اليدين أطلقنه
الى منها قلة عليه المعاسير
مايملكن أيدننا يخرجنه
من قبل لا تكثر علينا الدنانير
لاشك بعض ربوعنا مستجنه
قاموا علينا يطلقون الحناجير
أشوفها من غير لنه وهنه
قامت تفجر بعض الالغام تفجير
جتنابهم خيل الفسق مستعنه
مدري وش المقصد ورا مطير لمطير
حنا نسايرهم على حسن ضنه
ونسامح المخطي معزه وتقدير
والى تجاهلنا خطاهم محنعنه
قالوا بلاهم خوف والا معاسير
الخوف منه قلوبنا مطمئنه
ماهمنا شلفا ابن غانم ولا الزير
أن ألتفتنا للسباع المسنه
تبي تصير الشلف حدر القناطير
أخير للدنيا تجي مرجهنه
قدام راع الكير ينفخ على الكير
أن كان جت بالشعر حنا مغنه
حنا مصخرت التماثيل تصخير
لو نلحق المشقاص قوماً مرنه
فرت بعض ناساً فرير العصافير
الى فتحنا باب شعراً نكنه
يسلمانا الكافر ويركع لنا الطير
والله يالولي خطو رجلاً نحنه
لا اقلب عبى ناساً هنيا مخامير
لا اسن فيهم شي ماحدن يسنه
شياً نجيبه مقطعه من زمهرير
يابعضهم ياعضاه ماينهضنه
وانه لينكل عن جميع التهاتير
لاشك جتنا من ربوعاً مضنه
سوالفاً ماعرف لها كل تفسير
أقربهم مفرح هجوسه عصنه
شغل تماتيكه على غير تعيير
يوم البيوت اللي بنى شجعنه
أذاعها بين الدول والجماهير
وادلى على ربعه بشياً يضنه
يقول اشوف الشيب فيكم مغاتير
والشيب ياراع التماثيل سنه
ماعذرب اللي ينطحون الطوابير
حمّاية القشرى ثبار المدنه
الى قبلن ذولي وذولي مدابير
الشيب مابه عيب لاتحسبنه
العيب من جنب طريق المناعير
من شب شاب ولو سنينه عطنه
والشيب في وجه الرجل زود تقدير
وأن كان به عذروب مافيه منه
أنته نزلت مع الرشا لأسفل البير
عودٍ وجسمك يقرع اقراع شنه
تبي تصيغر وانته اكبر من النير
هرش الحضيره باركلّه بعنه
ثاوي وعينينه بالامه مطايير
الى شاف من تمشط شعرها بخنه
قام يتلفت وارزم ارزامت بعير
يبي السنين اللي مضن فاختنه
أيام ورد الماء ولبس المقازير
يومنهن بعيونهن يفتننه
نجل العيون مزعلات الحجاجير
اللي كما ارقاب المها ارقابهنه
تقول فيهن مثل ماياصف عمير
كن العسل في مفلج عذابهنه
والموت لامن دلعن بالازارير
كنك تشوف الماء ورا حلوقهنه
ونهودهن حمرن وفيهن دواوير
مثل ابو فيصل بالهوى يشعفنه
لاشك اضن الزند مافيه تشرير
واليوم فارقهن وهن فارقنه
لو انه اغلى الصبغ عند العطاطير
وهذي مجاراة شاعرنا لـ سعود الوسمي بقصيدته شيخة الغزل اللي يقول فيها
انا لي ثمان سنين اجامل وانا مجـروح
اكن الموده داخـل الصـدر واكتمهـا
سمعت الحمام اللي سجع فوق غصن الدوح
جذبني بنغماتن هل الحب تفهمها
تغنا بشعرن من شذاه العطور تفوح
يعطّر مسامع من سمع في ترنّمها
من الشاعر اللي قبل انا لاامدحه ممدوح
وكد قالوا الاجواد ماتهفي ذممها
غنيّن عن التعريف ازيد الوضوح وضوح
تباها به اشعاره يصخّر ملاحمها
عميد القصيد وفي عيون العدا ذرنوح
وهو الاديب ونفسه الرب ملهمها
شعاني وانا قلبي مع اهل الغرام ايتوح
هضمني وروحي قبله الحب هاضمها
جبرني ابوح وعادتي للخفا مااابوح
اداري عن السمعه ونفسي مشيّمها
اجامل وانا قلبي بسيف الغلا مصطوح
اكن العباير في ضميري وكاظمها
هليك ودريك ادوّر من البلال انشوح
وكبدي تفوح وبارد الشرب يلطمها
غديت الغليث اللي يخاف البروق تلوح
يسوج ويلوج ونفسه الغلث مسقمها
سبايب عنودن صار في حبلها ساموح
حرمني محجّرها وهي مثلي احرمها
علامه يفرّقنا لعله ماهو مبيوح
بنينا الامال وحاقد القلب هدّمها
ولاله مصالح بس غاد الجدا مشفوح
مسممّ ونفسه زايد الغيض سممّها
حقود وحسود ومسردن كنه النابوح
وذلوله على كل المغازي يدرهمها
عسى الله يلم الشمل بالصاحب النصوح
وتطيب النفوس اللي محيمه حوايمها
وتليم شفوف اهل الهوى والعدو مكبوح
وتلحق هواها المغرمه لجل مغرمها
تهيّا على وضح النقا دربها مبروح
انال الهنوف اللي ولامي موالمها
ويبرا فوادن من غرام الهوى ملحوح
لحاه الهوى وارثع بروحي وحطّمها
وتخايط جروح بداخل الضامر المشلوح
من الجادل اللي حاكمتني وحاكمها
هنوفن عيوفن من تولّع بها مسموح
كساها الحلا من الراس لاحد مقدمها
غنوجن عنوجن بهرجها للعرب سحوح
فتونن يضيّع كلمته من يكلّمها
بها من مهاة الريم غره وفيها لموح
تذوب القلوب بنارها ماتقاومها
عليها الله اكبر كيف جاحت فوادي جوح
بها النفس مرهونه ولاني بلايمها
تمركز غلاها غصب ماعاد هو ممسوح
ولاعاد لي سلطه على النفس ايممها
انا صاربي ماصار للخس ياملّوح
طواني هوا خلن طوى الحال واعدمها
خليلن تخلخل خل عقلي وشاحه شوح
عزلني عن العالم دها النفس واوهمها
خطاها كبر سنجار مير الخطا مدموح
لعل وعسا ترحم وذا من مكارمها
قصيدة اسندها الشاعر المرحوم :
سحلـي الـعـواي لشاعـرنـا
يازين شب النـار بـأرضٍ بياحـي
والزول يزميلي على مـد شوفـي
والبيت مبني والرعايـا ضواحـي
وانته تمشى مع نبـات الحروفـي
اخيـر مـن ذبـحٍ بليـا سلاحـي
بقبورت الحييـن مثـل الضعوفـي
ببيوتنـا مثـل الدجـاج المداحـي
مغير يـم السـوق ناخـذ ونوفـي
يابو خلف مامـن تجـدد مراحـي
متشفـقٍ عقـب الشـداد الردوفـي
يابو خلف صاحي ولاني بصاحـي
بس اتلفـت مثـل راس الخروفـي
خروفٍ أدلـم مايعـرف المتاحـي
وراعيه جابرتـه عليـه الظروفـي
ابكي على وقتٍ حظرتـه وراحـي
اتـلاه يامحمـد زمـان الكسوفـي
ياحيف ويـن مورديـن الرماحـي
اللي نهار الكـون تـرو السيوفـي
يالخس وين مطير هـاك النواحـي
سلفـان مثـل مزبـرات القنوفـي
تسايـروا ثـم صوتـوا بالفلاحـي
هيهات ياما فرقـوا مـن شفوفـي
خذتهـم الدنيـا هجـاد وصباحـي
وحنا بقينا عقـب هـاك الصفوفـي
صار العوض فيهم خطات الضياحي
ياعنـك ماكـدٍّ عليـه مخلـوفـي
يالخـس يومنـه تكسـر جناحـي
ماني على الدنيا كثيـر الحسوفـي
اليـوم موتـي والحيـاة متواحـي
يابو خلف منكف وعايـف وموفـي
اليـا ماتهيالـي غـزال البراحـي
مالـي بصيـد مخبطـات البلوفـي
يابو خلف ذا منهجـي واقتراحـي
وانته علـى رد المثايـل عروفـي
رد شاعرنا على الشاعر المرحوم :
سـحــلــي الـــعـــواي
ياسحلي العـواي منتـه مباحـي
ياللي تقول انك حوالا صفوفـي
الفرق واسع للسنيـن امتراحـي
قدام اجي وانته تغيـر وتحوفـي
لاشك معي انته تحب المزاحـي
وزلتك عندي يالسنافـي تطوفـي
وتقول انا يالخس ماني بصاحـي
واقول منته بصاحي ومهروفـي
ياللي تبي وقت له سنين ماحـي
يوم القبايل بيـن امـانٍ وخوفـي
يوم يحدا الخيال قـدم الطياحـي
والوقت زين وبأهل الوقت نوفي
يوم اصطفاق أمصمات اللواحـي
فج الزغون مقولمـات الخفوفـي
مركوب فرسانِ تبـوج الفياحـي
دايم لوجه الله عليهـن ضيوفـي
دايم يتلّـون النّضـى بالمشاحـي
ايضا ومعهم كـل قبـاً شعوفـي
اليا طالع السّبار شعل وشقاحـي
قالوا عليها ماسمعـت المعوفـي
مافعلهـم بالهندسـة والمساحـي
بالسيف الاملح فعلهم والكشوفـي
كم فارسٍ منهم تجنـدل وطاحـي
اليا جودوا خضر النمش بالكفوفي
مايطلبون الرزق عند السحاحـي
الرزق بيدين الرحوم العطوفـي
ارزاقهم حدر الدّخن والصياحـي
مثل السباع مـدورات العلوفـي
كم رفرفت راياتهـم بالنجاحـي
واليوم وقتٍ راح جعلـه ذلوفـي
يابو فهيد اسحب ذلاق الشّلاحـي
الجيل الاول له عيـالٍ وقوفـي
يامابهم من جمّ ماهـو ضحاحـي
لـولا اليديـن معقبـه للكفوفـي
مطير في ديرة طيـور الفلاحـي
اللي بهم عزّ وذراء ومعروفـي
بين السعود وبين نسل الصباحـي
في نعمتٍ مامثلهـا بالوصوفـي
شبعة وأمان وراحتٍ وانبطاحـي
ومنين ماوجهت جبـت الولوفـي
قصيدة اسندها شاعرنا لاخيه الشاعر الكبير :
صــحــن بـــــن قـويــعــان
ياصحن دالهٍ عـن مترفـات القبايـل
لين جاني من أرهقنـي ونكـد عليـه
قام يضحك ويجذبني وجيت متهايـل
ليـن مفتـاح قلبـي ضيعنـه يديـه
مثل ماضاع قلبك بالسنيـن الأوايـل
يوم تشري الهوى بالذمـه العامريـه
انت تدري وعنـدك للمحبـه دلايـل
كل ماخض ماء بالحوض ترد الضميه
لاتسايـل ولاتنشـد وخذنـا القوايـل
رغبة النفس ودتنـا حيـاض المنيـه
ياطبيب الهوى حنـا لقينـا الهوايـل
نظـرةٍ النـاظـر لـهـا جاذبـيـه
ماتميز من الخـده شقـار الجدايـل
اشتعـال البـروق بمزنـةٍ عقربيـه
خده اشقر عليه اشقر للـردف مايـل
فيه نورٍ وبـه نـارٍ تطـارد سويـه
مثل عنق الغزال اللي بوسط الجمايل
يوم فز وتشمحـط موحيلـه اوحيـه
كن جوهر عيونه ياصحن يوم اخايـل
حد سيفٍ شطير او خنجـرٍ نافعيـه
وان تبسم ببيضٍ بين حمـرٍ عسايـل
بايحوني تراني مت ابكتـب وصيـه
ويرد اخيه صحن بن قويعان
يامحمد شـداد الحـب صـار متمايـل
اشتريته وبعته يـوم طاحـت عصيـه
كد رقيت الطويل وكد تبعـت المسايـل
اشتهي المشي رجلي عن ركوب المطيه
وانت والله مالوك يوم خلـت المخايـل
كنك المضمي اللـي يابسـاتٍ رويـه
شفت بيض المحاجر والرموش الظلايل
شفت ماشاف بصري يوم تيـه خويـه
مثل ماينفـع العطشـان نشـح البلايـل
انت تنفعك نغمـات الهـروج الخفيـه
كلمة الحـب طـبٍ للقلـوب الغلايـل
هـي علاجـه وطبـه مايبـا صيدليـه
لك سنيـات يمـي مابعثـت الرسايـل
قلت حج وتطـوع واثـر نيتـك نيـه
احسب اللي مضالـك مابقابـه سمايـل
واثر سرحان مايدخل بحـوش الرعيـه
ويـوم طـق الزنـاد وولعـن الفتايـل
اجزم اني معك في كل حسنـه وسيـه
كان مافيـه شـيٍ فـات مانـي بقايـل
الصداقـه قديمـه والعلاقـه قـويـه
دام مافرقونـا بيـن حمـر النثـايـل
ماتخـرب صداقتنـا السنيـن المديـه
قصيدة اخرى اسندها شاعرنا لاخيه الشاعر الكبير
صــحـــن بــــــن قــويــعــان
ياصحن ياكثر زينٍ في سميـره
جل قدرة ربي اللي صورتهـا
لاعريض ولاطويل ولاقصيـره
مع نعومة عودها زين طخمتهـا
لاتحسب حساب هذيك الكبيـره
خالف الديمه سحابه وأدهمتهـا
يوم طبت صار بالملعب حشيره
صفق الجمهور والبيض أزعلتها
خدها شمس العصير المستديره
فرعت والقذله الشقراء كستهـا
كن وسط عيونها خيـلٍ مغيـره
والسيوف الحمر بيدين اركبتهـا
يوم تبلـج بالشفاتيـن المنيـره
هن حمر واللولو الأبيض تحتها
تذبح العشاق بأحرابٍ شطيـره
بين لـدات العيـون وسلهمتهـا
غرةٍ مامثلها وسـط الجزيـره
لا كستها بالذوايـب وأظهرتهـا
برق غراً قهقرتهـا المستثيـره
يظهر الربان من حدر هدبتهـا
كنها عنـق المهـاة المستذيـره
طالعت بأدباش بدوٍ وأذعرتهـا
ذكرتني مثلهـا تلعـا غريـره
قد خذت بسرة فؤادي وانهبتهـا
لو مودتها على قلبـي خطيـره
السنين اللي تقافـت مامحتهـا
فرد أخيه صحن بن قويعان
يامحمد وش قلب وضحاء سميره
وين هاذي عند ذيك وويـن جتهـا
ليه توصفها على اسـمٍ مستعيـره
كل شجرةٍ كود تعرف بشجرتهـا
انت لماً عني اخفيـت السريـره
أو درعت بعالمٍ ماعـرف لغتهـا
نوب اخوك بكل حاجه تستشيـره
ونوب تخفيها وتظهـر مشكلتهـا
جعل ربي مايغيـر لـك بصيـره
لاتغيـر مابـقـى الا خاتمتـهـا
البنات أصنـاف واشكـال كثيـره
والقبايـل كـل نفـسٍ وشهوتهـا
وأكثر الشوفـات مافيهـا بريـره
ودي انـك ماتلولـس بشبكتـهـا
انته مانته من قوانيص الجحيـره
لاتعـلـق نفسـهـا بمواعدتـهـا
عن هواها مكتفيـنٍ فـي منيـره
لو تبي تجلب سميـره ماشرتهـا
اترك اللي وردنا خالف صديـره
رد في عقلك وشف وش مصلحتها
لحقت المقفي على المطلب عسيره
الهوى فاتـت سنينـه واثمرتهـا
سد بيبانه عسـى بالأمـر خيـره
فكنـا مـن طرقهـا ومراقبتـهـا
قد حصلي فيـه وقفـاتٍ شريـره
مانسيت جروح كبـدي وافحمتهـا
----------
قصيدة شاعرنا في رثاء المغفور له بأذن الله الملـك فـهـد بــن عـبـد العـزيـز
ياعين هل الدمـع صـافٍ غزيـرا=مـن فجعـةٍ جتنـا سمعنـا نباهـا
تكسّـر العبـرات فـوق النظيـرا=يـوم الاذاعـة بثـت اول نـداهـا
نـداٍ يخلـي فكـر الامـه يحيـرا=ويكـدر العالـم ويزعـج هـواهـا
فجيعـةٍ فيهـا يحـيـر البصـيـرا=علـى جميـع المملكـة وصدقاهـا
ساعة سمعنا العلم حـاس المريـرا=ورتجـت العالـم وبيّـح خفـاهـا
تقول شعب المملكـة فـي حشيـرا=يومٍ بـه المرضـع تضيّـع نماهـا
الشعب كله فـي صيـاح وزفيـرا=يبكي ويبكون العـرب مـن وراهـا
في ساعـةٍ فيهـا النّفـس مايسيـرا=وعيون كـل الشعـب ينهـل ماهـا
مات الذي مثـل السـراج المنيـرا=سلطان نجد اللي عمرهـا وحماهـا
ابـو اليتامـى والعمـاء والفقيـرا=وابو الشعوب اللي رفـع مستواهـا
وابو صغير السـن وابـو الكبيـرا=وابو العروبه مـن شفاهـا إللفاهـا
خلا فقير الشعـب يلبـس حريـرا=ويعيـش عيشـه فالعمـر مانساهـا
هـو الفهـد مالـه سمّـيٍ خشيـرا=زعيم كـل العـرب رأس زعماهـا
وليا جاء على الاسلام شئٍ عسيـرا=تحيـر فيـه شعوبهـا وروسـاهـا
خـلا العسيـر بقـدرة الله يسيـرا=خلّـص مشاكلهـا وطمّـن عداهـا
وايضا وراء الشعب السعودي سهيرا=لابانـت الخلّـه عليـهـم رفـاهـا
لو أمدحه كبر السمـاء المستديـرا=وكثر النجوم وكثر الارض وحصاها
ما أحصيت فيه خصاله اللي يديـرا=اللـي فعلهـا فالحيـاه وقضـاهـا
كـم دولـةٍ عمّـر بناهـا تعميـرا=عاشت إبفضله ونجحت فـي بناهـا
قبله وهي في هـول نكـر ونكيـرا=لينه عليهـا ارخـى يـده وحتماهـا
خلا دول الاسلام فـي كـل خيـرا=يصرف له اشياءٍ عند ربي جزاهـا
وكم واحـدٍ مظلـوم جالـه ثويـرا=ويديه مـن خيـرات ربـي ملاهـا
وخيله على الاصحاب ماهي تغيـرا=وإلا العـدا يلعـن لـك الله ثواهـا
حتى عـدّوه فالسمـاء لـو يطيـرا=في قـدرة الله نزّلـه مـن إعلاهـا
يخضع حدر رجله ضعيفٍ حقيـرا=يجـي مثـل صـدام فـي منتهاهـا
يومنـه أخطـأ دربـه المستنـيـرا=جمّجمّتـه بنعـول رجلـه وطاهـا
خلاه يرغـي عقـب ذاك الهديـرا=حتـى معالمـه الكبيـرة محـاهـا
خـلاه يرغـي كارغيـان البعيـرا=في غرفـةٍ فيهـا بلاهـا وجلاهـا
هذي فعول مظيـر الخصـم ظيـرا= فهد الفهود الليـث مقعـد صغاهـا
ويوم انتهت ماعـاد عنهـا مطيـرا=اقفـى عـن الدنيـا وخـلا غثاهـا
عساه فـي جـاه البشيـر النذيـرا=في جنة الفـردوس يسكـن ثراهـا
والشكـر للـرّب العزيـز القديـرا=والحمد له حيـث المصيبـه رفاهـا
قـاد السفينـه فـي محلـه خبيـرا=اللـي ليـا قـاد السفينـه قـداهـا
عبد الله اللـي مايخـون الضميـرا=تبشر بعـز المملكـة يـوم جاهـا
لعلّـهـا تنـعـم بحـكـة كثـيـرا=وسكانهـا عسـاه يكسـب رضاهـا
تصير فـي عهـده ربيـع وغديـرا=والشعـب يلقـى نعمـةٍ ماشراهـا
ولي عهده جعل ما أجلـه قصيـرا=الله يجيـره مـن مصايـب بلاهـا
القايـد الوجـه البشـوش السفيـرا=ريس ركـون المملكـة ووزراهـا
بجـاه رب البيـت مغـن الفقيـرا=وبجاه أبونـا ادم وموسـى وطاهـا
تعز الاسره مـن كبيـر وصغيـرا=والمملـكـة تعـزّهـا وتحمـاهـا
يالله يالـلـي للهبـايـب تـديــرا=يامنشئٍ مـن غـر الامـزان ماهـا
تحمى السعود من أي شـرٍ شريـرا=حيث انهم شجـرة يـذرّي ذراهـا
يعيـش حـدر ظلالهـا المستجيـرا=من صكته سمـر الليالـي نصاهـا
ال السعـود اللـي تعيـش الفقيـرا=لعـل ربـي مايـفـرّق عصـاهـا
وهـذا وصلـى الله وسلـم كثيـرا=علـى نبـيٍ كـل الامـه هـداهـا
تنبيه : الديــــوان منقــــول من منتدى الصمّـــان والكاتب ابو فــــلاح .
المشــرف العـــام
وهذي قصيدة شاعرنا بمناسبة عودة الشيخ جابر الصباح من رحلته العلاجيه فـــي اغـسـطــس 2005
فالسنه عيدين والثالث قـدوم الشيـخ جابـر=يوم عاد من المرض سالم على الديره واهلها
مرحبا عـداد مايـذّن علـى روس المنابـر=او عدد ماهلّت المزنـه مـن الماطـر هللها
فيك يانور الوطن واهل الوطن والكل خابـر=انّك العرق المغـذّي للبـلاد ومـن دهلهـا
جعل ربّن يبعـث اللـي ميّتينـن فالمقابـر=عنك يرفع صدمته وينـزّل الصحـه بدلهـا
ياحبيب الشعب كل الشعب متكـدّر وصابـر=من مرضك نفوسهم مرضا يشايلهـا زعلهـا
من ولاهم لك وحبك جعل شرّك عنك عابـر=تهتف امتّك الذي عدلك عـن الميلـه عدلهـا
لك محلّن فالقلوب من الصغار اليا الاكابـر=حيث وصّلت الوطن واهله حياتن ماوصلهـا
من يبا ينسا جميلك من جميع الشعـب ثابـر=وانت لولا الله ثم لولاك كان الشعـب اكلهـا
شلت عن شعبك احمول الظيم فأيّامن غوابـر=مايشيل الكايدات مـن الحمـول الا جملهـا
عشت ياشيخ البلاد اللي على الصكّات صابر=شايلن هم الجميـع وكـل صكّـه محتملهـا
يوم جتنا قـوّة اللـي معتـدي دقّ الاشابـر=واقفن في وجهها كالليـث ليـن الله خذلهـا
بالسياسه والصبر شلته مع المطـلاع دابـر=ثم رحل من فضل رب البيت ماكنـه نزلهـا
كن جيشـه ماتمركـز بالمهاجـع والعنابـر=قوّتن مثل الجـراد المنتشـر ربـي فشلهـا
التقت في جيش داس خشومها هي والصوابر=ضربتن يصبح بها الشايب ولد ظافن سبلهـا
يوم صار القصف والماص الحمر جاله تنابر=اعذر الطمّاع وايدينه عن الطمعـه غسلهـا
ثم غدا كبر الذبابـه عقـب تفتيـل العظابـر=قادها الله قود لين انه رمابـه فـي وحلهـا
في قيادتك الحكيمه عنـه سدّيـت المعابـر=مالقا دربن يعبره مع سهلهـا ومـع جبلهـا
عشت ياامير البلاد اللي بك الشعب امتجابر=راضي (ن) في دبرتك وعيون حسّاده كحلها
جعل نفسن ماتحبك مالهـا فـالارض قابـر=وان حصل يوم الحساب الله لايحسن عملهـا
قلتها من قلب مخلص ماقصد نتف الاوابـر=والسلام ختام وايـام الفنـا يـدرج عجلهـا
-------------------------------------------------
منقــــول من منتدى الصمّـــان والكاتب ابو فــــلاح .
.... مواضيع مشابهة أو ذات علاقة بالموضوع :
ليست هناك تعليقات:
إرسال تعليق
أهلا بك ،
أشكر لك إطلاعك على الموضوع و أن رغبت في التعليق ،
فأرجو أن تضع إسمك ولو حتى إسما مستعارا للرد عليه عند تعدد التعليقات
كما أرجو أن نراعي أخلاقيات المسلم;حتى لانضطر لحذف التعليق
تقبل أطيب تحية
ملاحظة: يمنع منعا باتا وضع أية : روابط - إعلانات -أرقام هواتف
وسيتم الحذف فورا ..