احفظ حبال الود

يا متعب الشعار يا بيت القصيد

لولا تعبهم فيك ما جالك طراه

كم لي وانا ادور على معنى جديد

ما كل من دور على الطيب لقاه

لو كل من يحذف حصاه يجيب صيد

ما كان نحتاج البنادق والرماه

ولو ينصرف في البنك شيك بلا رصيد

كلٍ طمع في الدر الأصلي واشتراه

لعيون من يبحث عن الدر الفريد

هذي وصاة لمن يحفظون الوصاة

يمكن ليا نصبت موازين العبيد

ترجح بميزاني ويكتَب لي نجاة

ايامنا ما كلها فرحة وعيد

وإن عشت يومك ما ضمنت اللي وراه

والرجل مهما عاش في الدنيا سعيد

لا بد ما يحتاج ربعه واقرباه

لا تقطع ارحامك ويشملك الوعيد

ولا تخسر الغالي ولا ترخص غلاه

واخوك لا تخسره لو إنه عنيد

يخطي مية مره وتسمح له خطاه

وإن كان شد الحبل حاول ما تزيد

ارخيه قبل الشد يوصل منتهاه

ولا تنصحه وقت الزعل ما يستفيد

واعرض عليه النصح في ساعة رضاه

وليا طلب رايك عطه رايٍ سديد

وإن ما طلبك الراي لا تبحث خفاه

واعرف ترى قرب المنازل ما يفيد

واحيان يبدي شي ما ودك تراه

لكن لا تقرب ولا تنزل بعيد

خلك على قول المثل حذفت حصاه

واحفظ حبال الود حفظك للوريد

اللي معلق فيه موتك والحياة

ترى الأخو مهما حصل يبقى عضيد

وترى عيال العم ماعنهم غناة

الناس دايم ما تهاب اللي وحيد

اللي ليا منه وقف محدٍ معاه

لو كان في الميقاف عزمه من حديد

لابد بعض احيان ينزل مستواه

واخذ الحذر لو كنت في قصرٍ مشيد

الذيب لولا فطنته كلٍ رماه

لا تامن الدنيا لها مكرٍ وكيد

يمكن تحدك صوب شخصٍ ما تباه

إليا رمتك بوجه شيطانٍ مريد

طاغي ومتمسك بقانون الطغاة

ثبت عليه شهود والخالق شهيد

لا تندفع للشر وتسوي كماه

واتبع دروب الحق عنها لا تحيد

ويبين راعي العرف من راعي العياة

ولا تبدي أسرارك لزيد ولا عبيد

من يحسدون الرجل في زاده وماه

لا جوك قول الله يدبر ما يريد

ولا تعرض الدعوة على غير القضاة

إلا على شيخٍ وله عقلٍ رشيد

وإلا على مطنوخ له منصب وجاه

- عبد الله الطلحي