طنايـا و أنشـد التاريـخ ، طنايـا و أنشـد الأجيـال
صنعنـا مجدنـا مـن فعلنـا للضيـف والـغـاره
نزلنا في صروح العز ، وعلى روس الجبال جبـال
نبيع الروح في سوق الشمـوخ ونرخـص أسعـاره
على عسر الدهور زحول ، وعلى ثقل الحمول جمال
ثوابـت مايغيرنـا يـسـور الـوقـت وعـسـاره
سجايانـا هـلا بهـل الركايـب لا اشْلَهَـبّ الــلال
كرمنـا حاتمـي و بهجـتـه لاشــاف خـطـاره
فعايلنـا كتبهـا السيـف وغناهـا الدهـر مــوّال
ألا يـا ناشـدن عنـا سـل التـاريـخ وخـبـاره
ذرا الملهـوف لاحدّتـه عسـرات الزمـن للجـال
نـزل عنـد الطنايـا وكـل دار(ن) للطـنـا داره
ذراريهـم ذراريـنـا لـهـم بقلوبـنـا مـنـزال
حديهـم قبـل لا يكفـي عيالـه يكتفـي جــاره
يدينا عن سمـوم القيـظ صفّـت للدخيـل ظـلال
نـزل منـا علـى راس السنـام بكامـل أوقـاره
ولا نغـدر بذمتنـا لـه الـدم الحـمـر سـيّـال
سناعيـس المنايـا تنتخـي لـه سـر وجـهـاره
لنا ثوب الصخا ملبوس ، لنا عـز النفـوس عقـال
توارثنـا كرامتـنـا سقـاهـا الـجـد لصـغـاره
بسـوق المـوت مهجتنـا جلبنـا والـحـدب دلاّل
نبيع الروح يـوم أقبـل عجـاج المـوت وغبـاره
نعـدّل مـن مضاربنـا مسيـر المعتـدي لا مـال
ركبنـا غصـب لامنّـه خيـول النصـر ومهـاره
كبار صحون للعانـي ، وسـاع طعـون بالمنـزال
ركايبنـا تجاذبـنـا تسابقـنـا عـلـى الـغـاره
وذا مال الدهـر ساعـه وعـادات الدهـر ميّـال
نشـوم وربنـا يخلـف علينـا الــدار بـديـاره
أبـد مـا نقبـل الشينـه أبـد مـا نقـبـل الإذلال
يموت الشمـري شامـخ علـم مـا تنطفـي نـاره
ولو طيب العـرب مهـره لـزوم الشمـري خيّـال
يطيب الكيف لاهـل السيـف حنـا البـن وبهـاره
ملكنا (الميم) ثـم (الجيـم) ، ملكنـا ،عقبهنّ (الـدال
بيـارق لابتـي تصنـع خفـوق المجـد وشعـاره
أنا مهما مدحت أعجز ودربـي فـي ثناهـا طـال
ولو أثنيـت مـا أوفـي لذكـره عشـر معشـاره
تحيـات الوفـا والعـز وتحيـة مجدنـا الشعّـال
أقدمهـا عـن الأسلـم وعـن عبـده و سنـجـاره
الشاعر/الاديب
2004
ليست هناك تعليقات:
إرسال تعليق
أهلا بك ،
أشكر لك إطلاعك على الموضوع و أن رغبت في التعليق ،
فأرجو أن تضع إسمك ولو حتى إسما مستعارا للرد عليه عند تعدد التعليقات
كما أرجو أن نراعي أخلاقيات المسلم;حتى لانضطر لحذف التعليق
تقبل أطيب تحية
ملاحظة: يمنع منعا باتا وضع أية : روابط - إعلانات -أرقام هواتف
وسيتم الحذف فورا ..