خالد بن ماجد الهواشله

هجم الحوثين على موقع للقوات السعوديه   ، فأنسحبت  مجموعة من الموقع  وتركوا سيارة الحكومة "برادو " ووصل العلم

للنقيب "خالد بن ماجد الهواشله الدوسري"  وكانوا قد سلموا   ورديتهم ، فرجع وصعد الجبل وأخذ السيارة من بين الحوثين وتبعته مجموعته   وحرر الجبل هو ومجموعته
                                    القصيده لأحد زملاه شاعر قحطاني بيض الله وجهه ومن يقرا

النقيب ومجموعته👇💙

عليك يا خالد أسوق المواويل
ومن لايغني فيك شعره خساره
فزعتك يوم السبت بين المقاتيل
يضرب بها الأمثال تصبح عباره
سبقتنا للموت في غرة أبريل
وبانت فعولك يالبطل في المناره
يوم إن بعض الناس خلف البراميل
وبين الجيوب تشد سلك الإشارة
والا انت ياوجه السعد والرجاجيل
شميت بارود العدو والحراره
وطشيت درعك ياشنب والدرابيل
وفي الضلع نجماتك حثاها غباره
وحمي الوطيس العصر ثم قرب الليل
وشنيت ياروس الدواسر بغاره
تشهدلك الاجواد جيل ورى جيل
طهرت النقطه من أيدي القذاره
وثقل الحمل ومتونك اعراضن تشيل
بلغ سلامي والدك والبشاره
واليا لفو حرابة الهجن والخيل
وتقادحت منهم شراره شراره
يبشر بفزعة فارس يصهل صهيل
تاره يصول ويقطع الراس تاره
خالد ابوماجد مايشتكي الحيل
الموت الاحمر يوم طال إنتظاره
في السلم نطقه عذب واحلى من النيل
وفي الحرب نار ولاتجي حول ناره
في عاكفه أوفى كحيلان بالكيل
وشد العمامه ثم فك الزراره
وتحلحلت عندالمجوسي الصواميل
خلاه أبوماجد  ينفض وزاره
لك راية بيضا عليها قناديل
ترفع على روس البدو والحضاره
تشوفها حتى العمي والمهابيل
وتنحت على صم الصخر من وقاره
ترفرف لياهب الهوى يمين وتميل
وفي الليل كالعرجون شعشع إنارة
ومن ذاق من مر الحياة الغرابيل
وتجرعت نفسه كؤوس المراره
حول على خالد زبون المشاكيل
بعد الله يحل العقد بإختياره
غنيتها لك مقدريه وتبجيل
لأني اشوفك ياالشلي في الصداره
تستاهل أبيات الشعر والمواويل
ومن لا يغني فيك شعره خساره