السلام عليكم
قصيدة للشاعر صقرالنصافي يقول فيها:
اليوم ياعيني علامك ترفين ولانتي على العادة بنثر الدموعي
اما يبي يلفيك علمن ماهوزين
والااتذكر ماغدى من اربوعي
ياكثر ما نذكر من الناس غاليين
حدر الثرى ماعاد فيهم رجوعي
راحوا مراحن منه ماهم ملفين
صارت منازلهم عذابن لشوعي
الله على وقت مضى مثل هالحين
ابعد علي اليوم من حب كوعي
الياذكرته والمخاليق غافين
جريت مايفتح مفالج اضلوعي
يوم ان وقتي مقبلن يا ادعج العين
عروس عشق ومعجبتها الدفوعي
واليوم وقتي صار بين اليهاهين
اليا طاب لي يوم خبث لي اسبوعي
دنيا نبي منها عدال الموازين
وتميل لوني في خطاها جزوعي
تضحك لناس بالفرح مستمرين
وناسن تجيهم بالكدر والفجوعي
وصارت بها سود المقانع شياهين
وفحولها صاروا تبوع التبوعي
الصدى
وهذه مجاراة الشاعر فيصل الرياحي على قصيدة صقر النصافي
العين حساسه ومادراك ما العين
تعطي خبر عن ماتكن الضلوعي
ياخذ خبرها نسبه الصدق تسعين
من واقع الحال وصفاه الطبوعي
وعين النصافي يوم رفت لثنتين
اما فرح ولاعلوم تروعي
مقاس الاحساس وصدور البراهين
والتجربه بين الضرر والنفوعي
حياتنا هاذي ميادين تمرين
والسبت مايلحق نهار الربوعي
اسبوعها هالحين ياصقر يومين
وعود شهرها مثل راس السبوعي
مكاره تلبس من المكر وجهين
وتنصب مطبات الخطر للوقوعي
مجنونه والناس فيها مجانين
الا التقيين السجود الركوعي
وجدي على وقت تقافا من سنين
وهذا مثل ماقلت صعب الرجوعي
احن للماضي حنين المحبين
على بعضهم يوم فرقا النجوعي
ليا لاح براق من سهيل ويمين
وبرق شمال ونوهو بالنزوعي
ذولا مسانيد وذولاك منحين
ساقتهم اخبار المطر والرجوعي
بدو خلت مرحانهم والمعاطين
ماحولها غير السراب اللموعي
معاد فيها مبرك للبعارين
ولا الغراب اللي عليها يقوعي
تفرقوا كل على رغبته وين
يتلون شف مذربات السموعي
الوسم طاح وساقوا البوش عجلين
يلعب مغنيهم بروس الفروعي
الا اثنين بالغرام متهاوين
هاك النهار ينزفون الدموع
هذاه وجدي يازبون المخلين
وانا بوقت منه يصعب طلوعي
صابر وهمي مندفن في الشرايين
لا الوقت وقت لي ولا النوع نوعي
ياصقر سامحني بعد رفت العين
وتم البحر والقافيه والقروعي
ماقول غير الله يحفظ السلاطين
اللي على شعب الجزيرة دروعي
ليست هناك تعليقات:
إرسال تعليق
أهلا بك ،
أشكر لك إطلاعك على الموضوع و أن رغبت في التعليق ،
فأرجو أن تضع إسمك ولو حتى إسما مستعارا للرد عليه عند تعدد التعليقات
كما أرجو أن نراعي أخلاقيات المسلم;حتى لانضطر لحذف التعليق
تقبل أطيب تحية
ملاحظة: يمنع منعا باتا وضع أية : روابط - إعلانات -أرقام هواتف
وسيتم الحذف فورا ..